AMARHUBO 6 - IsiNdebele 2012 Translation

Umthandazo wokubawa umusa ngesikhathi sokubandezeleka

¹ Kumkhaleli; ngesililiso seenara; ngeTjheminithi; irhubo lakaDavida.

² Somnini, ungangikhalimi ngobukhali bakho, ungangibethi uselakeni lakho.

³ Yiba nomusa kimi, Somnini ngombana ngibuthakathaka. Yewungipholise Somnini ngombana ngisebuhlungwini,

⁴ iye, umphefumulwami ukhathazeke khulu. Awu Somnini, kuzabe kube nini na?

⁵ Phenduka Somnini! Hlenga ipilwami! Ngisindise ngenca yokwethembeka kwakho

⁶ ngombana akukho ukukulotjha kwabafileko. Ngubani okudumisako endaweni yabafileko na?

⁷ Sengidiniwe ngesibibithwana sami: Ubusuku boke ngithambisa umsamelwami; iye, ngimanzisa umsemami ngeenyembezi.

⁸ Amehlwami avuvukile ngebanga lesizi, ayafiphala ngenca yezitha zami zoke.

⁹ Dedani kimi noke nina benzi bobumbi ngombana uSomnini usizwile isililo sami;

¹⁰ uSomnini usizwile isibawo sami sesirhawu, iye, uSomnini uwamukele umthandazwami.

¹¹ Zoke izitha zami zizakukhena, zikhathazeke khulu, zibuyele emuva, zidane masinyana.