AMARHUBO 58 - IsiNdebele 2012 Translation

Abakhohlisi bazakugwetjwa

¹ Kumkhaleli; “Ungatjhabalalisi”; lakaDavida; iMikitamu.

² Nina abanamandla, niyazikhupha iinqunto ezilungileko, nigwebe abantu ngokufaneleko na?

³ Awa! Eenhliziyweni zenu nisopha okumbi; izandla zenu ziphehla inturhu ephasini.

⁴ Iinkhohlakali ziphambuke zisabikwa; abakhohlisi bonakele basabelethwa.

⁵ Isihlungu sabo sinjengesenyoka; bavala iindlebe zabo inga lirabi elisithulu,

⁶ ukuze bangezwa ilizwi labosomlingo, ngitjho nosomlingo ongumakadebona.

⁷ Zimu, yephula amazinyo ngemlonyenabo! Somnini, phohloza imihlathi yamabhubezana!

⁸ Abanyelele njengamanzi ehlabathini, batjhwabe njengotjani obugadangiweko.

⁹ Ababe njengomhlobo wesibungu oncithika uphele, babe njengombungu orhulukileko ongazange ubone ilanga.

¹⁰ Ngokuzuma okukhulu uZimu uzabasusa, abavuthele njengommoya otjhisako basaphila.

¹¹ Abalungileko bazakuthaba nababona ukubuyiselela, bahlanze iinyawo zabo eengazini zeenkhohlakali.

¹² Abantu bazakuthi: “Ngambala kukhona umvuzo wabalungileko, iye, ukhona uZimu ogwebako ephasini.”