AMARHUBO 57 - IsiNdebele 2012 Translation

UZimu udunyiswa ngesirhawu sakhe

¹ Kumkhaleli; “Ungatjhabalalisi”; lakaDavida; iMikitamu, lokha nabalekela uSawula ngerholweni.

² Ngirhawukele Zimu, ngirhawukele ngombana kuwe umphefumulwami uyaphephela; ngikhosela emthunzini wamaphikwakho, kufikela lapha kudlula khona ubhubhani.

³ Ngilila kuZimu ongoPhezulu, iye, kuZimu ongenyelako.

⁴ Uzakuthumela isizo lisuka ezulwini, angisindise. Uzakuraranisa labo abangiwalazelako. UZimu uzakuthumela ukwethembeka neqiniso lakhe.

⁵ Ipilwami iphakathi kwamabhubezi, kufuze ngilale neendlamuntu. Amazinywazo amikhonto nemisubela, amalimu wazo ayisabula ebukhali.

⁶ Zimu, phakama ngaphezu kwamazulu, iphazimulwakho ayibe ngaphezu kwephasi loke.

⁷ Abantu babekele amagadangwami isifu; ummoyami wephukile. Bangembele umgodi emzilenami, kodwana kukhalakathele bona.

⁸ Zimu, ihliziywami inzinzile, iye, ihliziywami inzinzile; ngizakuvuma, ngidumise.

⁹ Vuka, mphefumulwami, vuka! Ngeenara zamaharibha ngizakuphaphamisa ukusa.

¹⁰ Somandla, ngizakudumisa hlangana nabantu, ngikhalele ingoma kuwe phakathi kwezizwe.

¹¹ Ukwethembeka kwakho kuphakeme njengamazulu neqiniso lakho lelulekele emafini.

¹² Zimu, phakama ngaphezu kwamazulu, iphazimulwakho ayibe ngaphezu kwephasi loke.