AMARHUBO 56 - IsiNdebele 2012 Translation

Ukwethemba uZimu nanyana ugandelelwa

¹ Kumkhaleli; livunywa ngeenodo zeZuba lama-Owuku asemaJukujukwini; lakaDavida; iMikitamu, lokha nabhudungelwe maFilista eGathi.

² Ngirhawukele Zimu ngombana abantu bayangibhozomela. Ilanga loke bangigandelela ngokulwa.

³ Iye, ilanga loke izitha zami ziyangibhozomela! Ngambala banengi abalwa nami. Wena ongoPhezulu,

⁴ lokha nanginokwesaba, ngibeka ithemba lami kuwe.

⁵ UZimu engidumisa ilizwi lakhe, nguZimu engimethembako. Nje-ke angeze ngibe nevalo. Alo, umuntu nje angangenzani na?

⁶ Ilanga loke abangethuselako badunga ummoyami; yoke imikhumbulwabo igaya iimbozi ngami.

⁷ Baphehla inturhu, bakhukhuthe. Batjheja imikhambo yami, ngethemba lokuqeda ipilwami.

⁸ Kukhona ukuphunyurha ebumbini na? Ngobukhali bakho Zimu, guqisa izizwe.

⁹ Wena ngokwakho ukutlolile ukuzulazula kwami. Faka iinyembezi zami ngekwanenakho yesikhumba, kufuze zitlolwe encwadinakho.

¹⁰ Mhlana ngikubizako, izitha zami zizakudeda isinyava. Mina ngiyakwazi lokho: UZimu unami.

¹¹ UZimu engidumisa ilizwi lakhe, iye, uSomnini engidumisa ilizwi lakhe,

¹² nguZimu engimethembako. Nje-ke angeze ngibe nevalo. Alo, umuntu angangenzani na?

¹³ Zimu, kuwe ngenze iimfungo; ngizakunikela kuwe imihlabelo yokuthokoza

¹⁴ ngombana ungisindise ekufeni neenyawo zami kobana ngingakhutjwa ukuze ngikhambe phambi kwakaZimu ekukhanyeni kokuphila.