AMARHUBO 55 - IsiNdebele 2012 Translation

Ukwethembeka kuSomnini ngeenkhathi ezibudisi

¹ Kumkhaleli; ngesililiso seenara; iMaskili; lakaDavida.

² Zimu, beka indlebe emthandazwenami, ungazifihli esibaweni sami.

³ Ngizwe, ungiphendule, ekububuleni kwami ngigandelelekile. Ngiwurubajekile

⁴ ngebanga letjhada lezitha, nokutlewula kweenkhohlakali: Zingethusela ngobumbi, ngelaka zingibambela ivunda.

⁵ Ihliziywami iyathuthumela, ukwesabeka kokufa kungehlele.

⁶ Ngingenwe livalo nokuqhaqhazela, ngembathwe kuhlengezela.

⁷ Ngithi: “Ngathana bengingaba namaphiko njengezuba, bengizokuphaphela kude ngihlale khona.

⁸ Iye, bengizokubalekela kude, ngiyozihlalela erhalawumbeni.

⁹ Bengizakurhabela ukuzifunyanela isiphephelo, kude nesivunguvungu nesiwuruwuru.”

¹⁰ Somandla, bararanise, uhlangahlanganise ikulumabo ngombana ngiyibonile inturhu nombango edorobheni;

¹¹ ubusuku nemini ulizombelezile, ngitjho naphezu kwemithangalalo. Ubukhohlakali nomonakalo kungaphakathi kwalo;

¹² iye, ngaphakathi kwalo kunokubhujiswa; ukubandezela nekohliso akusuki ecabazini lalo.

¹³ Nangabe bekusisitha esinginyefulako bengizokuthwala lokho; nangabe bekungongizondako, oziphakamisa phezu kwami bengizombhacela.

¹⁴ Kodwana manje nguwe ntangami, mnganami nomkhozami,

¹⁵ iye, wena ebenginobudlelwano obuhle nawe, siya endlini kaZimu kanye nebandla elithabileko.

¹⁶ Kwanga ukufa kungazehlela izitha zami, zehlele endaweni yabafileko zisezwa ngombana ubumbi buseenhliziyweni zazo, iye, ngaphakathi kwazo.

¹⁷ Mina ngilila kuZimu, nje-ke uSomnini uzangisindisa.

¹⁸ Ntambama, ekuseni nemini ngithulula isililo sami, ngibubule; yena iyalizwa ilizwi lami.

¹⁹ Epini engiqalene nayo uzangihlenga ngingalimali, nanyana babanengi abajamelene nami.

²⁰ UZimu obusa nini nanini, uzakwizwa, athobise izitha. Yena akaphenduki, khonapho azimesabi.

²¹ Untangami ungibeke isandla, wephula isivumelwano.

²² Ilimu lakhe libutjhelelezi kunamafutha wepehlo, kodwana ihliziywakhe inelunya; amezwakhe athambile kunamafutha, kodwana ayisabula erhwatjhiweko.

²³ Phosa umthwalwakho kuSomnini, yena uzakusekela, angekhe avumela olungileko asikinywe.

²⁴ Kodwana nakuzizitha zona, wena ngokwakho Zimu uzaziphosela emgodini wethuna. Abomele iingazi nabakhokhobeli angeze baphile ngitjho ingcenye yemihla yabo. Nakungimi, ngethemba wena Somnini.