AMARHUBO 53 - IsiNdebele 2012 Translation

Ukonakala kwabantu

¹ Kumkhaleli; ngeMarhalathi; iMaskili; lakaDavida.

² Iindlhayela zizitjela zithi: “UZimu akakho.” Zikhohlakele, zenza izinto ezinyenyisako; akakho noyedwa owenza okulungileko.

³ UZimu usezulwini, uqala abantu ephasini ukubona bonyana kukhona ohlakaniphileko, orhuluphela uZimu na.

⁴ Kodwana boke baphambukile, boke bonakele ngokufanako; akakho noyedwa owenza okulungileko, akakho ngitjho namunye.

⁵ Kanti abenzi bobumbi abalemuki na? Labo abatla abantu bami inga badla isikwa, abambizi uZimu.

⁶ Nje-ke bazakuba nevalo khulu, babe nevalo ebangazange khebabenalo ngombana uZimu uzokusabalalisa amathambo walabo abakuvimbezelako. Uzabarhubutjha ngombana uZimu ubalahlile.

⁷ Kwanga isindiso ka-Israyeli ingavela eZiyoni! Lokha uZimu natjhugulula ubujamo babantu bakhe, uJakopo uzakurhuwelela ngethabo, iye, u-Israyeli uzakuthaba.