AMARHUBO 51 - IsiNdebele 2012 Translation

Umthandazo wokubawa ukuhlanjululwa

¹ Kumkhaleli; irhubo lakaDavida

² ekufikeni komphorofidi uNathani emva kokungena kwakaDavida kuBhathi-Tjheba.

³ Ngirhawukele Zimu, ngokwethembeka kwakho; sula iimphambeko zami ngokwesisa sakho esikhulu.

⁴ Ungihlanzisise ecaleni lami, ungihlambulule esonweni sami.

⁵ Ngambala ngiyazazi iimphambeko zami nesono sami siphambi kwami mlibe.

⁶ Ngonile kuwe, iye, kuwe wedwa; ngenze ameswe phambi kwakho. Wena ulungile nawuthwesa umlandu, awusoleki nawukhupha isigwebo sakho.

⁷ Ngambala, ngabelethwa nginecala, ngibe sisoni umma asangibamba.

⁸ Wena uthanda ngibe neqiniso ngaphakathi, nje-ke, ungifundisa ukuhlakanipha ehliziyweni.

⁹ Ngirhuhle ngehisophi ukuze ngihlambuluke, ungihlanze ngibe mhlophe kunogabhogo.

¹⁰ Ngenze ngizwe ithabo nenjabulo godu, wenze umzimba owufihlizileko uhlokome.

¹¹ Fihla ubuso bakho ezonweni zami, usule koke ukonakala kwami.

¹² Zimu, ngidalela ihliziyo ehlanzekileko, uvuselele ummoya oqinileko ngaphakathi kwami.

¹³ Ungangilahli ebukhoneni bakho, ungangemuki uMoyakho oCwengileko.

¹⁴ Buyisela kimi ukwenama kwesindiswakho, ungisekele ngommoya wokuzimisela.

¹⁵ Ngifuna ukufundisa abaphambukako iindlela zakho ukuze izoni ziphendukele kuwe.

¹⁶ Zimu, ngephule ecaleni leengazi, iye, wena Zimu wesindiswami, khona ilimu lami lizakukhalela ngokulunga kwakho.

¹⁷ Somandla, vula iimbhena zami ukuze umlomami umemezele idumo lakho.

¹⁸ Mbala awuthandi umhlabelo. Nanyana benginganikela ngomhlabelo wokutjhiswa bewungeze wawukarekela.

¹⁹ Umnikelo owamukelekako kuZimu umumoya ophukileko. Iye Zimu, ihliziyo ephukileko nedabukileko, angekhe wayiqalela phasi.

²⁰ Yenzela iZiyoni okuhle ngethando lakho, uvuselele imithangala yeJerusalema.

²¹ Ngalokho uzakujabulela imihlabelo efaneleko, iye, imihlabelo yokutjhiswa njengeminikelo etjhiswa yoke; nje-ke, e-aldarini lakho kuzakunikelwa ngeenkunzi.