AMARHUBO 50 - IsiNdebele 2012 Translation

UZimu ugweba abantu bakhe

¹ Irhubo laka-Asafa. UZimu ongaphezu kwabosingazimu okutjho uSomnini, uyakhuluma; ubiza iphasi kusukela epumalanga bekube setjingalanga.

² Kusukela eZiyoni elipheleleko ngobuhle, uZimu ukhanya ngokudarhileko.

³ UZimethu uyeza begodu angeze athula, phambi kwakhe kunomlilo oqothulako, uphahlwe siwuruwuru esesabekako.

⁴ Ubiza amazulu phezulu kanye nephasi kobana agwebe abantu bakhe,

⁵ athi: “Ngibuthelani abathembekileko bami, labo abenza isivumelwano nami ngomhlabelo.”

⁶ Amazulu amemezela ukulunga kwakhe, athi: “Mbala, uZimu umugwebi!”

⁷ UZimu uthi: “Yizwani nina bantu bami, ngizakukhuluma, wena Israyeli, ngizakufakaza ngokujamelana nawe. NginguZimu, uZimakho.

⁸ Angikukhalimi ngebanga lemihlabelwakho, Israyeli. Imihlabelwakho yokutjhiswa ihlala iphambi kwami njalo.

⁹ Angidingi ukuthatha ikunzi emizinenu, namkha iimbuzi eembayeni zenu

¹⁰ ngombana zingezami zoke iinyamazana zehlathi neenkomo ezisemibundwini eyikulungwana.

¹¹ Ngazi zoke iinyoni zeentatjana neenkhakhabi zommango zingezami.

¹² Ibe thana bengilamba, bengingeze nganitjela ngombana iphasi nakho koke okukilo kungekwami.

¹³ Kanti mina ngidla inyama yeenkunzi, ngisele iingazi zeembuzi na?

¹⁴ Yenzani ukuthokoza kwenu kube mhlabelo kuZimu, niphethe iinthembiso zenu kongoPhezulu.

¹⁵ Ngibizani ngelanga lembandezeleko, mina ngizanitjhaphulula, nina nizangihlonipha.”

¹⁶ Kodwana kokhohlakeleko uZimu uthi: “Unelungelo liphi lokumemezela iimiso zami bewukhulume ngesivumelwano sami na?

¹⁷ Wena uzonda ukusolwa namezwami uwaphayela ngemva kwakho.

¹⁸ Lokha nawubona isela, uvumelana nalo; umdibi munye neenhlobongi.

¹⁹ Uliselela umlomakho kibo boke ubumbi, ubophele ilimu lakho ekohlisweni.

²⁰ Uditjha ngokunyefula umfowenu, uhlebe umntwanakwenu.

²¹ Nawenza lokhu, kufuze ngithule na? Udlumbana bona nami ngifana nawe? Awa, ngiyakukhalima, ngibeke iimphambeko zakho phambi kwakho.

²² “Yelelani indaba le, nina enikhohlwa uZimu, nakungasinjalo ngizanidabula, kutlhogeke nomenyeli.

²³ Loyo oletha ukuthokoza njengomnikelwakhe, uyangihlonipha; owenza ngendlela leyo, ngizomambulela isindiso kaZimu.”