AMARHUBO 5 - IsiNdebele 2012 Translation

Umthandazo wokubawa ukuvikeleka

¹ Kumkhaleli; livunywa ngamafludu; irhubo lakaDavida.

² Hawu Somnini, beka indlebe emezwinami, uzwe ukububula kwami.

³ Yelela ilizwi lesililo sami, wena Kosami noZimami ngombana ngithandaza kuwe.

⁴ Kosami, ulalela ilizwi lami ekuseni; kuthi ngamasa ngendlale isibawo sami phambi kwakho ngiyalindele.

⁵ Wena awusuye uZimu ozwana nekohlakalo, okumbi angeze kwahlala kuwe.

⁶ Abazitjhayako angeze bajama phambi kwakho, boke abenzi bobumbi uyabazonda.

⁷ Abakhuluma amanga uyababhubhisa. Iye, uSomnini uyamnyenya umbulali nomkhohlisi.

⁸ Kodwana mina, ngomusakho omkhulu ngingangena endlinakho, ngokukuhlonipha ngizakukhothama ngethempelini lakho elicwengileko.

⁹ Somnini, ngebanga lezitha zami, ngirhole ngokulunga kwakho, yenza indlelakho ihlelembe phambi kwami.

¹⁰ Ngambala akunaqiniso emlonyenazo, imizindlwazo igcwele ukubhubhisa, umphimbazo ulithuna elivulekileko, ilimu lazo likabili.

¹¹ Zimu, zenze zithwale icala lazo, amaqhingazo abe kukuwa kwazo. Ziqotjhe ngebanga leemphambeko zazo ezinengi ngombana zikuhlubukile.

¹² Yenza boke abaphephela kuwe bathabe, benze bahlale bavuma iingoma ngokwenama. Yembesa isivikelo sakho phezu kwabo, abakhathalela ibizo lakho basase kuwe.

¹³ Mbala Somnini, nguwe obusisa abalungileko, umusakho ubavikela mazombe njengesihlangu.