AMARHUBO 49 - IsiNdebele 2012 Translation

Ubudlhayela bokuthembela emnothweni

¹ Kumkhaleli; kumaKhorarhi; irhubo.

² Yizwani lokhu noke nina zizwe, iye, noke nina enakhileko ephasini. Bekani indlebe

³ nina bantukazana neenkhulu, nani njinga nabadududu noke.

⁴ Umlomami uzakukhuluma ukuhlakanipha, ukuzindla kwehliziywami ngizakwenza kuzwisiseke.

⁵ Izaga ngizilalelisisa kuhle, ngirarulule iinrarejo zami ngomvumo weharibha.

⁶ Alo, kubayini kufuze ngesabe ngesikhathi esimbi, lokha ubukhohlakali babakhohlisi nabungizombileko,

⁷ okutjho labo abathemba umnothwabo, nabazigqaja ngobukhulu bobunjinga babo na?

⁸ Mbala, umnotho lowo angeze wahlenga umuntu. Umuntu angeze awunikela uZimu kobana ube sihlengo sakhe.

⁹ Isihlengo sepilo yabantu sibiza khulu, yeke umuntu akakhohlwe nokukhohlwa

¹⁰ kobana angaphila ngaso isiphelani ukuze angasaboni ukufa.

¹¹ Ngambala kuyakhanya: Abahlakaniphileko bafa ngokufanako neendlhadlha neeyila. Bayabhubha, umnothwabo usalele abanye.

¹² Amathuna alikhaya labo nini nanini, iye, bazakuhlala kiwo iinzukulwana ngeenzukulwana, nanyana banamasimu abizwa ngamabizwabo.

¹³ Umuntu angeze ahlala namagugwakhe isiphelani, ufana neembandana ezibhubhako.

¹⁴ Injalo indlela yabazethembako nalabo abathokozele amezwabo ngemva kokufa kwabo.

¹⁵ Njengezimvu babuthelelwe endaweni yabafileko ukufa kuyabelusa. Ekuseni abaqotho bagadanga phezu kwabo, isibumbeko sabo sitjhabalaliswa yipethu, indawo yabafileko izakuba likhaya labo.

¹⁶ Kodwana uZimu uzakuhlenga umphefumulwami esandleni sokufa, iye, angisuse.

¹⁷ Ungadani lokha omunye nanjingako, nalokha umnotho wendlwakhe nawukhulako

¹⁸ ngombana nafako akazukuthatha litho, umnothwakhe angekhe wehle naye.

¹⁹ Abantu bayamdumisa umuntu lokha nazenzela okuhle. Kodwana nanyana aziphakamisa epilwenakhe,

²⁰ uzakuya kiboyisemkhulu, abangeze basabona ukukhanya nini nanini.

²¹ Umuntu onomnotho kodwana anganalwazi ufana neembandana ezifako.