AMARHUBO 46 - IsiNdebele 2012 Translation

UZimu ubuphephelo

¹ Kumkhaleli; kumaKhorarhi; ngesinara esiphezulu; ingoma.

² UZimu ubuphephelo namandlethu; mbala ufumaneka alisizo ngeenkhathi zobudisi.

³ Yeke angekhe sesaba, ngitjho nanyana iphasi lizamazama, iintaba zisikinyeka ekuzikeni kwamanzi;

⁴ namtjhana amanzi welwandle arhuba, abhubhudlha amagwebu neentaba zidengezeliswa kubhodla kwalo.

⁵ Kukhona umlambo onemisele ethabisa umuzi kaZimu, indawo ecwengileko, lapha kuhlala khona ongoPhezulu.

⁶ UZimu uhlala ngemzini lowo, angekhe wasikinywa uZimu uzawuhlenga ngetathakusa.

⁷ Izizwe ziyavungama, imibuso iyazamazama; uZimu nazwakalisa ilizwi lakhe, iphasi liyancibilika.

⁸ USomnini uMninimandlawoke, unathi; uZimu kaJakopo ubuphephelo bethu.

⁹ Yizani nizobona imisebenzi kaSomnini, obanga izehlakalo ezethusako ephasini:

¹⁰ Uthulisa izipi ephasini loke, aphokghoze imisebe, aphohloze imikhonto, aphosele iinhlangu ngemlilweni.

¹¹ Uthi: “Thulani! Yazini bona nginguZimu, ngimkhulu phezu kwezizwe, ngimkhulu phezu kwephasi.”

¹² USomnini uMninimandlawoke, unathi; uZimu kaJakopo ubuphephelo bethu.