AMARHUBO 45 - IsiNdebele 2012 Translation

Irhubo lokuthatha kwengwenyama

¹ Kumkhaleli; ngeTjhotjhanimu; kumaKhorarhi; iMaskili; ingoma yethando.

² Ihliziywami iyaphuphuma ngamezwi amahle; ngizakwethula amezwi wekondlwami engwenyameni, ilimu lami lifana nesiba lakasosiba onobukghoni.

³ Uyaqaleka wena kunabantu boke; isisa sithululelwe eembheneni zakho ngombana uZimu ukubusise isiphelani.

⁴ Wena ngorho, hloma isabulakho enyonga, lokho kube lidumo nobukhosi bakho,

⁵ iye, ubukhosi bakho. Yiba nepumelelo nawuphumako ngenca yeqiniso nokujamela ukulunga! Isandla sakho sokudla asikwenzise imisebenzi eyesabekako.

⁶ Ngwenyama, imisubela yakho ibukhali, ihlaba ehliziyweni yezitha zakho, ziwe ngaphasi kwakho.

⁷ Isihlalo sakho Ngwenyama, ngesanini nanini; intongakho yobukhosi ingeyokulunga;

⁸ uthanda ukulunga, uzonda okumbi. Ngalokho Ngwenyama, uZimakho ukuzese ngamafutha wokwenama ngaphezu kwabangani bakho.

⁹ Zoke izambatho zakho zifufuzelwe, ngemire, iqolo lesikghopha namakhwa wesinamoni. Eengodlweni ezikghatjiswe ngamazinyo wendlovu kubethwa imitjingo eyenza wename.

¹⁰ Amakhosazana azihlobise ngobuphaziphazi bakho, ngesidleni sakho kujame indlovukazi, ihlobe ngegolide le-Ofiri.

¹¹ Lalela wena ndodakazi! Phosa amehlo ubeke indlebe, ukhohlwe abantu bekhenu nendlu kayihlo.

¹² Lokha ingwenyama nayikhangwa bubuhle bakho, kumele uyikhothamele ngombana iyikosakho.

¹³ Kosazana yeTirosi, abanjingileko bazakuncenga umusakho ngezipho.

¹⁴ Ngevunulo kanokutjho ikosazana leyo ilinde ngelawini, ingubayo irutjelwe ngegolide.

¹⁵ Ilethwa ekosini yembethe imibalabala, ilandelwa matlawana, iimpelesi zayo. Iye, balethwa kuwe, Ngwenyama.

¹⁶ Ngokulilizela nokwenama, bayahlahlwa ekungeneni kwabo ngesigodlweni.

¹⁷ Amadodanakho Ngwenyama, azakuhlala esikhundleni saboyihlo. Uzawenza abe makhosana enarheni yoke.

¹⁸ Ngizakwenza ibizo lakho lidunyiswe eenzukulwaneni zoke, ngalokho abantu bazakudumisa ngokungapheliko.