AMARHUBO 44 - IsiNdebele 2012 Translation

Umthandazo wokubawa isizo

¹ Kumkhaleli; iMaskili lamaKhorarhi.

² Zimu, sizwile ngeendlebe zethu, abokhokho bethu basitjelile, ngemisebenzi oyenzileko emihleni yabo, iye, emihleni yakade.

³ Nguwe owaqotjha bezizwe ngesandla sakho, kodwana abokhokho wabatjala. Nguwe owahlunguphaza izizwe, kodwana abokhokho wabatjhaphulula.

⁴ Ngambala ngeenhlabano zabo, azange bathumbe inarha, namkha bahlule ngeenkhwepha zabo. Kwaba ngesidla sakho nangengalwakho nokukhanya kobukhona bakho ngombana bewubathanda.

⁵ Wena Zimu, uyiKosami, yeke layeza ukuhlula kwakaJakopo.

⁶ Ngesizo lakho sizakutlhofoza izitha zethu; ngebizo lakho sizakugadangela abasivukelako.

⁷ Angithembeli emsebenami nesabulami angeze yangisindisa.

⁸ Ngambala, wena usisindisile ezitheni zethu bewaphoqa abasizondako.

⁹ Woke amalanga sazigqaja ngawe, Zimu, sadumisa ibizo lakho ngesikhathi soke.

¹⁰ Nokho sewusilahlile, bewasirhubutjha begodu awusaphumi nezipi zethu.

¹¹ Usenze sabalekela izitha nabasizondako bazizuzele ipango.

¹² Usenze safana nezimvu zokuhlatjwa bewasihlakazela ezizweni.

¹³ Uthengise isizwe sakho ngetupurujwana, akhange usibize inani eliphezulu nawusithengisako.

¹⁴ Usenze isiphoqo sabomakhelwana bethu, isithuko nesinyefulo kilabo abasiphahlileko.

¹⁵ Usenze isaga hlangana nabezizwe nehlekiso phakathi kwabantu.

¹⁶ Ilanga loke ihlazo lami liphambi kwami nobuso bami bugcwele iinhloni,

¹⁷ ngebanga lamezwi wabangiphoqako nabangithukako, iye, nokobana ngiphambi kwesitha nakumbuyiseleli.

¹⁸ Koke lokho kusehlele; nokho asikakukhohlwa wena, namkha sibe bakhohlisi esivumelwaneni sakho.

¹⁹ Ihliziywethu akhange ihlanuke namagadangwethu akhange asuke endlelenakho,

²⁰ kobana ungabeze usiphahlazele edzabeni labophagana bewusigubuzese ngethunzi elesabekako.

²¹ Nangathana besikhohlwe ibizo lakaZimethu, namkha selulela izandla zethu kuzinyana othileko,

²² uZimu gade angekhe akubone lokho na? Angitjho yena wazi iimfihlo zehliziyo!

²³ Ngebanga lakho sibulawa imihla yoke, sesesifana nezimvu zokuhlatjwa.

²⁴ Somandla, akhe uvuke! Ulaleleni kanti? Sikima, musa ukusilahla isiphelani!

²⁵ Ubufihlelani ubuso bakho na? Kubayini ukhohlwe iinhlungu nokugandelelwa kwethu?

²⁶ Ngambala, umphefumulwethu unyelela ethulini; imizimbethu inamathele ehlabathini.

²⁷ Sikima, uze kobana usisize! Yewusihlenge ngebanga lokwethembeka kwakho.