AMARHUBO 43 - IsiNdebele 2012 Translation

¹ Ngihlambulule Zimu, ujamele indabami ebantwini abangakholwako; ungisindise kabakhohlisako nabangakalungi

² ngombana wena unguZimu engiphephela kuye. Alo, ungilahleleni na? Kubayini kufuze ngikhambe ngeenzilo, ngebanga lokugandelelwa zizitha na?

³ Thuma ukukhanya neqiniso lakho, ukwenze kungirhole. Kungirholele entabenakho ecwengileko, okuyindawakho yokuhlala

⁴ ukuze ngiye e-aldarini lakaZimu, iye, kuZimu wokuhlokoma kwami. Nje-ke ngizakudumisa ngeharibha, wena Zimu onguZimami.

⁵ Umphefumulwami udaneleni, uyaluzelani ngaphakathi kwami na? Angiqalelele kuZimu ngombana ngizamdumisa godu, yena omsindisami noZimami.