AMARHUBO 42 - IsiNdebele 2012 Translation

Ukulangazelela ubukhona bakaZimu

¹ Kumkhaleli; iMaskili lamaKhorarhi.

² Njengehlangumataka ilangazelela amanzi wemilanjana, ngokunjalo umphefumulwami ulangazelele wena, Zimu.

³ Umphefumulwami womele uZimu, iye, uZimu ophilako. Ngizakuya nini ngethempelini ngiyozizwela ubukhona bakaZimu na?

⁴ Ubusuku nemini, iinyembezi zami zikukudla kwami ngombana soke isikhathi abantu bathi kimi: “Njekhona uphi uZimakho?”

⁵ Lezi zizinto engizikhumbulako lokha nangithulula umphefumulwami: Ngakhamba newoma, ngaya endlini kaZimu ngokuhlokoma nokudumisa, isiqubuthu sagidinga umnyanya.

⁶ Umphefumulwami udaneleni, uyaluzelani ngaphakathi kwami na? Angiqalelele kuZimu ngombana ngizamdumisa godu, yena omsindisami

⁷ noZimami. Umphefumulwami udanile! Ngalokho ngiyakukhumbula ngisemisukeni yeJordani, eentabeni zeRherimoni, esiqongolweni seMitsari.

⁸ Ukuzika kumemeza ukuzika lapha kuhlokoma khona iimphoroma zakho! Woke amagagasi namagwimbakho eqe ngaphezu kwami!

⁹ Emini uSomnini uyaleza ukwethembeka kwakhe, kuthi ebusuku ingomakhe ibe kimi, iye, umthandazo kuZimu wepilwami.

¹⁰ Ngithi kuZimu olidwala lami: “Ungikhohlweleni na? Kubayini kufuze ngikhambe ngeenzilo, ngebanga lokugandelelwa zizitha na?”

¹¹ Ukungikhola kwezitha zami kungihlaba ehliziyweni, nazisoloko zithi kimi: “Njekhona uphi uZimakho?”

¹² Umphefumulwami udaneleni, uyaluzelani ngaphakathi kwami na? Angiqalelele kuZimu ngombana ngizamdumisa godu, yena omsindisami noZimami.