AMARHUBO 40 - IsiNdebele 2012 Translation

Ukwethemba isindiso kaSomnini

¹ Kumkhaleli; irhubo lakaDavida.

² Ngaqalelela bengaqalelela uSomnini, wabeka indlebe, wezwa isililo sami.

³ Wangikhupha ngemgodini wokufa, iye, edakeni elimodzako; wajamisa iinyawo zami edwaleni, wangikhambisa endaweni eqinileko.

⁴ Wabeka ingoma etja emlonyenami, indumiso yokubabaza uZimu. Abanengi bazakubona lokho besabe, bathembele kuSomnini.

⁵ Ubusisiwe othembela kuSomnini, ongaphendukeli ezitheni nakwabadlhemadlhema ngemva kwabosingazimu.

⁶ Wena Somnini Zimami, akakho ongafaniswa nawe: Uzandisile iimangaliso nemizindlwakho ngathi. Nangifuna ukuyitjho engikhuluma ngayo, iba minengi khulu kobana ingabalwa.

⁷ Imihlabelo neminikelo yeenthoro awuyithokozeli; iye, imihlabelo yokutjhiswa neyehlambululo awuyibizi. Ukotakote iindlebe zami,

⁸ nje-ke ngithe: “Qala, ngizile njengombana ngitlolelwe njalo emsongweni.

⁹ Ngiyathanda ukwenza intandwakho, Zimami nomthethwakho ungaphakathi kwami.”

¹⁰ Ngimemezele ebandleni elikhulu iindaba ezihle zokulunga. Mbala, akhange ngivale umlomami njengombana wazi wena, Somnini.

¹¹ Akhange ngigodle ubulungiswa bakho ehliziywenami, ngikhulume ngobuqotho nangesindiswakho; ukwethembeka neqiniso lakho akhange ngikufihle ebandleni elikhulu.

¹² Yeke Somnini, ungagodli umusakho kimi; kwanga ukwethembeka neqiniso lakho kungangilonda isiphelani.

¹³ Ngiphahlwe zizinto ezimbi ezingabalekiko, iye, amacalami angitholile, manengi kuneenhluthu zehlokwami; ngitjho nokubona angisaboni, sengiphelelwe mamandla.

¹⁴ Somnini, kwanga ungathokozela ukungisindisa; ube masinyana Somnini ekungisizeni.

¹⁵ Boke labo abafuna ukuhlwitha ipilwami, kwanga bangadaniswa bebakhene, kuthi labo abangifisela okumbi, bakhahlamezelwe emuva bebaphoqeke.

¹⁶ Abakakamale ngenca yokuphoqeka, labo abathi kimi: “Arha! Uswinakele!”

¹⁷ Kodwana boke abakufunako abajabule bename ngawe; kwanga abathabela isindiswakho, bangatjho njalonjalo bathi: “USomnini uyababazeka!”

¹⁸ Nakungimi yena, ngichakile ngiyaswela, nokho uSomandla uyangikhumbula. Wena ungumsizami nomsindisami, yeke, ungariyadi wena, Zimami.