AMARHUBO 39 - IsiNdebele 2012 Translation

Ipilo yomuntu yifitjhani

¹ Kumkhaleli; kuJedutuni; irhubo lakaDavida.

² Mina ngathi: “Iindlela zami ngizaziqaphela ukuze ngingoni ngelimu lami, mlunga okhohlakeleko asesephambi kwami, ngizakulonda umlomami ngesifonyo.”

³ Bengisimumu, ngizithulele, kodwana ukuthula kwami akhange kusize litho; ubuhlungu bami bakhambelela,

⁴ ihliziywami yavutha ngaphakathi kwami, kuthe ngisabubula, ngezwa kutjhisa, nje-ke ngatjhaphulula umlomami ngathi:

⁵ “Somnini ngazise ukuphela kwami, nokobana siyini isilinganiso samalangami; ngazise bona ngingodlulako.

⁶ Qala, wenze amalangami aba yikereketjhana, ukuphila kwami kulilize phambi kwakho; mbala, woke umuntu umuphefumulo nje.

⁷ “Kwamambala, umuntu ukhamba njengethunzi; iye mbala, uzikhathaza ngelize; uyabuthelela, kodwana akamazi ozokuhlomula.

⁸ “Yeke Somnini, yini okhunye engisakuqaleleleko? Ithemba lami likuwe.

⁹ Ngisindise kizo zoke iimphambeko zami, ungavumi ngibe siphoqo sabokeke.

¹⁰ Ngizazithulela, ngingawuvuli umlomami ngombana nguwe Somnini owenzileko.

¹¹ Susa kimi isibetho sakho ngombana sengifile mivimbo yesandla sakho.

¹² Ufundisa umuntu ngokumkhalimela ngecala; njengomvunya ovithizako, wena uqeda okuligugu kuye: Mbala, woke umuntu umuphefumulo nje.

¹³ “Yizwa umthandazwami Somnini, ubeke indlebe esililweni sami, ungathuli ngeenyembezi zami ngombana kuwe ngisikhonzi, ngisithekeli njengabo boke abokhokho.

¹⁴ Susa amehlwakho kimi, ukuze ngikwazi ukumomotheka ngaphambi kobana ngigoduke, ngingasabakhona.”