AMARHUBO 38 - IsiNdebele 2012 Translation

Isibawo sesindiso

¹ Irhubo lakaDavida; livunywa emnikelweni wesikhumbuzo.

² Somnini ungangikhuzi ngelaka lakho, namkha ungikhalimele ngobukhali

³ ngombana imisubelakho ingenile kimi nesandla sakho sesehlele phezu kwami.

⁴ Akusenapilo emzimbenami ngebanga lelaka lakho; akukho ukuthula emathanjenami ngenca yesono sami.

⁵ Mbala amacalami adlula ihlokwami, njengomthwalo obudisi khulu ayangidisibeza.

⁶ Amancebami ayabhibhidlha, anuke ngebanga lobudlhayela bami.

⁷ Sese ngigobene, ngikoropene khulu; ngikhamba ngeenzilo imini yoke.

⁸ Iye, idini lami liqaqamba khulu nepilo ayikho enyamenami.

⁹ Ngibuthakathaka begodu ngivithikile; ngiyabubula ngenca yokubibitheka ehliziywenami.

¹⁰ Somandla, koke ukufisa kwami kuphambi kwakho; ukubalabala kwami akukafihleki kuwe.

¹¹ Ihliziywami iyadukuza namandlami angitjhiyile, ngitjho nokukhanya kwamehlwami kukhambile.

¹² Abangani nabakhozi bami bajamela kude neenhlungu zami; ngitjho neenhlobo zami zijamele kude nami.

¹³ Abantu abafuna ipilwami bangibekela isifu, kuthi abasophe ukungilimaza, bakhulume ngokungisongela, bahumuze ikohliso ilanga loke.

¹⁴ Kodwana mina nginjengesithulu, angibalaleli! Nginjengesimumu esingavuli umlomo;

¹⁵ iye, nginjengomuntu ongezwako nonganakuphikisa emlonyenakhe.

¹⁶ Kodwana ngiqalelele kuwe Somnini, nguwe Somandla Zimami ozangiphendula.

¹⁷ Ngikubawe ngathi: “Labo abazikhukhumeza ngami, ungabavumeli bajabule lokha inyawo lami nalitjhelelako.”

¹⁸ Emanyeni, sengiseduze nokuwa nesihlabi singinamathele.

¹⁹ Ngiyalivuma icala lami, ngibuhlungu ngesono sami.

²⁰ Kodwana izitha zami ziphilile, zinamandla begodu banengi abangizonda ngokungakafaneli.

²¹ Babuyiselela okuhle ngokumbi, bayangisola nanyana ngiqotho.

²² Somnini ungangitjhiyi! Zimami, ungabi kude nami!

²³ Somandla, Sindiswami, rhaba ungisize!