AMARHUBO 37 - IsiNdebele 2012 Translation

USomnini usindisa olungileko

¹ Irhubo lakaDavida. Ungathakasi ngabenzi bobumbi, ungazikhathazi ngabangakalungi

² ngombana bazakutjhwaba msinyana njengotjani, iye, babune njengeemila ezilihlaza.

³ Nawethemba uSomnini, wenze okulungileko, khona-ke uzakuhlala enarheni, wename unzinzile.

⁴ Thaba kuSomnini, uzakunikela iimfiso zehliziywakho.

⁵ Nikela indlelakho kuSomnini, umethembe, yena uzakwenzela okulandelako:

⁶ Uzakwenza ukulunga kwakho kukhanye njengokusa nobumsulwa bakho njengelanga emini.

⁷ Thula phambi kwakaSomnini, uqalelele kuye; ungathakasi ngophumelelako endlelenakhe, iye, ngomuntu owenza okuphambeneko.

⁸ Lisa ukuhluthuleka, utjhide elakeni, ungathakasi ngabenzi bobumbi! Lokho sekubanga ukona kwaphela.

⁹ Abenzi bobumbi bazakususwa, kodwana abarhuluphela uSomnini bazakuzuza inarha.

¹⁰ Kuzakuba muzuzwana isikhohlakali singasabi khona nalokha uhlola indawaso, awusoze usasifunyana.

¹¹ Kodwana abathobekileko bazakuzuza inarha, bathabele ukuthula okukhulu.

¹² Isikhohlakali sisongela olungileko, simgugudela amazinyo,

¹³ kodwana uSomandla uyasihleka, uyazi bonyana ilanga laso liyeza.

¹⁴ Iinkhohlakali zirhwatjha isabula, zigobe imisubazo, kobana ziwise abachakileko nabadududu bezirhayile abaneendlela eziqotho.

¹⁵ Isabulazo izakuhlaba iinhliziyo zazo nemisubi yazo iphohloke.

¹⁶ Okuncani anakho olungileko, kungcono kunomnono weenkhohlakali ezinengi.

¹⁷ Mbala, imikhono yeenkhohlakali izakwephulwa, kodwana uSomnini uyabasekela abalungileko.

¹⁸ USomnini uyawazi amalanga walabo abamsulwa nelifa labo lizakuhlala bekube nini nanini.

¹⁹ Ngesikhathi sobunzima angeze badaniswa, emalangeni wendlala bazakusutha,

²⁰ kodwana iinkhohlakali zizakubhubha; izitha zakaSomnini zizakunyamalala njengobuhle bamadlelo anyamalala entuthwini.

²¹ Isikhohlakali siyaboleka, singasabuyiseli, kodwana olungileko unesirhawu, uyaphana.

²² Labo ababusiswe nguSomnini, bazakuzuza inarha, kodwana abanikelelwe nguye, bazakujutjwa.

²³ Lokha uSomnini nathokoziswa yindlela yomuntu, uqinisa amagadangwakhe.

²⁴ Nanyana akhutjhwa, akasoze awele phasi ngombana uSomnini uhlala ambambe ngesandla sakhe.

²⁵ Gade ngimutjha, manje sengimdala, nokho angizange ngibone olungileko atjhiyiwe nesapho lakhe ligogela ukudla.

²⁶ Yena ungophanako nobolekisanako nesapho lakhe lisibusiso kuye.

²⁷ Deda kokumbi, wenze okuhle ukuze nini nanini uhlale enarhenakho.

²⁸ Ngambala uSomnini uthanda ukulunga, akabatjhiyi abathembekileko bakhe. Iye, abalungileko bazakulondolozwa isiphelani, kodwana isapho leenkhohlakali lizakujutjwa.

²⁹ Abalungileko bazakuzuza inarha, bahlale kiyo nini nanini.

³⁰ Umlomo wolungileko uveza ukuhlakanipha; kuthi ilimu lakhe likhulume ukulunga.

³¹ Umthetho kaZimakhe usehliziywenakhe neenyawo zakhe azitjheleli.

³² Isikhohlakali selusa olungileko ngombana simsongele ukumbulala.

³³ USomnini akasoze aliselela olungileko esandleni sesikhohlakali: Angeze avume alahlwe lokha nadoselwa ebandla.

³⁴ Rhuluphela uSomnini, ukhambe endlelenakhe, yena uzakuphakamisa, uzuze inarha; ubone ukususwa kweenkhohlakali.

³⁵ Ngisibonile isikhohlakali sinobudlova, siziphakamisa njengomuthi wendabuko onamakari,

³⁶ kodwana nawudlulako godu, qala, umuthi lowo awusekho; nasifuna isikhohlakaleso, akhange sisatholakala.

³⁷ Qalisisa omsulwa, ubeke ilihlo koqotho: Kunelikusasa emuntwini onokuthula.

³⁸ Kodwana abaphambukileko bazakubhujiswa ndawonye nelikusasa leenkhohlakali lizakususwa.

³⁹ Ukusindiswa kwabalungileko kuvela kuSomnini, isiphephelo sabo esikhathini sobunzima.

⁴⁰ USomnini uyabasiza abe abaphephise; iye, ubaphephisa eenkhohlakalini; ubasindisa ngombana baphephela kuye.