AMARHUBO 36 - IsiNdebele 2012 Translation

Ubukhohlakali babantu nomusa kaZimu

¹ Kumkhaleli; irhubo lakaDavida, inceku kaSomnini.

² Phakathi kwehliziyo yesikhohlakali, kubusa isiphambeko. Ngokubona kwaso akunasidingo sokwesaba uZimu.

³ Emehlwenaso sizitjhaya khulu kobana singabona icala laso besilizonde.

⁴ Amezwaso amamala nekohliso; silise ukuhlakanipha nokwenza okuhle.

⁵ Embhedenaso sisopha ikohliso sidzimelele ekwenzeni okumbi asinyenyi ukonakala.

⁶ Somnini, ukwethembeka kwakho kunabele emazulwini, nobuqotho bakho bufika emkayini.

⁷ Ukulunga kwakho kunjengeentaba ezikulu, ubulungiswa bakho bunjengamalwandle azikileko. Wena Somnini, usindisa abantu neenlwana.

⁸ Maye, kuligugu elingangani ukwethembeka kwakho Zimu! Boke abantu bakhosela emthunzini wamaphikwakho.

⁹ Bayaqabuleka endlinakho, ubakholisa ngamanzi womlambo ohlobileko

¹⁰ ngombana kuwe kunomthombo wokuphila; iye, ekukhanyeni kwakho sibona ukukhanya.

¹¹ Yenabisa ukwethembeka kwakho kilabo abakwaziko nokulunga kwakho kilabo abaqotho ngehliziyo.

¹² Ungavumeli inyawo lozigqajako lingigadange, namkha isandla seenkhohlakali singiqotjhe.

¹³ Qala bona ziwe njani iingilamkhuba; iye, zimadlheke phasi, asoze zisavuka.