AMARHUBO 35 - IsiNdebele 2012 Translation

Umthandazo wokusindiswa ezitheni

¹ Irhubo lakaDavida. Somnini, phikisana nabaphikisana nami, ulwe nalabo abalwa nami.

² Hloma ngekhande nesihlangu, usikime kobana ungisize.

³ Rhwatjha umkhonto nesilembe, uqalane nabalandelana nami. Yithi kimi: “Ngiyisindiswakho.”

⁴ Akuthi labo abazumana nami badane, barhubutjheke bebabaleke; iye, abangisongelako bakhene.

⁵ Ababe njengomungu ophetjhulwa mumoya, lokha ingilozi kaSomnini nayibadudulako;

⁶ indlelabo ibe mnyama, itjhelele, lokha ingilozi kaSomnini nayibagijimisako.

⁷ Bangembele umgodi ngaphandle kwesizathu, bawufihla ngokuwembesa ngenedabo; iye, bangembele wona kunganabanga.

⁸ Ukubhujiswa akubehlele bangakanaki, kuthi isifu abasithiyileko sibambe bona; bawele ngemgodinapho babhubhe.

⁹ Khona-ke ngizakuthaba kuSomnini, ngename ngokusindisa kwayo.

¹⁰ Ngamandlami woke ngizakuthi: “Somnini, ngubani onjengawe? Wena osindisa ohluphekileko kilabo abanamandla kunaye, iye, ohluphekileko nodududu kilabo abamdlelezelako.”

¹¹ Kuvuka abofakazi abanelunya bangibuza izinto engingazaziko.

¹² Bangibuyiselela okumbi ngokuhle; ngizizwa inga ngilahliwe.

¹³ Kodwana nakugula bona, mina ngembatha izambatho zokuzila, ngazikhandla ngokuzila ukudla; ngaqinisela ekubathandazeleni.

¹⁴ Kwaba sengathi ngililela umngani namkha umfowethu. Ngembatha iinzilo, ihlokwami ikhotheme, ngakhamba njengotlhuwileko ngonina.

¹⁵ Kodwana ekukhutjhweni kwami bona bajabula babuthana ndawonye. Babuthana kobana bangibethe ngingakatjheji, bangidabula bangasakhawula.

¹⁶ Ekuhluzeni kwami abaphoqi bangiphoqa, bangigugudela amazinyo.

¹⁷ Somnini, lokho uzakubukela bekube nini na? Ngisindise elunyeni labo, iye, ipilwami eligugu emabhubezini.

¹⁸ Ngizakuthokoza ebandleni elikhulu, ngikudumise phakathi kwesiqubuthu.

¹⁹ Ungavumeli izitha zami, iye, abakhohlisi bajabule ngami nabangizonda kunganasizathu bona bangikhwinyisele.

²⁰ Ngambala abakhulumi ukuthula begodu kilabo abahlezi ngokuthula enarheni basopha izinto eziyikohliso.

²¹ Bangikhamisela imilonyanabo bathi: “Arha! Arha! Sizibonele ngawethu.”

²² Somnini, uyakubona lokho, nje-ke ungathuli; ungabi kude nami, Somnini.

²³ Zimami, Somandla, phakama! Sikima umele indabami, ungivikele!

²⁴ Somnini, Zimami, ngimela ngokulunga kwakho! Ungabavumeli bajabule ngami.

²⁵ Ungabavumeli bathi eenhliziyweni zabo: “Arha, nakho-ke ebesikufisa!” Ungabavumeli bathi: “Simginyile.”

²⁶ Akuthi boke abathakasa ngesizi lami badaniswe bebakhene; labo abazikhukhumeza ngami, bembathiswe ihlazo neenhloni.

²⁷ Kuthi abathokoza ngobumsulwa bami, bahlokome, bajabule. Njalonjalo bathi: “Mkhulu uSomnini othatjiswa kuthula kwencekwakhe.”

²⁸ Nje-ke ilimu lami lizakumemezela ukulunga kwakho, iye, ilanga loke idumo lakho.