AMARHUBO 34 - IsiNdebele 2012 Translation

USomnini uvikela abaphephela kuye

¹ Irhubo lakaDavida; ngemva kokusuka kwakhe esigodlweni saka-Abimeleki ngombana azenze ihlanya, nje-ke waqotjhwa.

² USomnini ngizamdumisa ngeenkhathi zoke; ngizakuhlala ngimbabaza njalo ngomlomami.

³ Mina ngizazikhakhazisa ngoSomnini, abathobekileko abezwe lokho, bajabule.

⁴ Phakamisani uSomnini kanye nami, sikhulise ibizo lakhe kanyekanye.

⁵ Ngathandaza kuSomnini, wangiphendula; wangitjhaphulula kikho koke ukwesaba kwami.

⁶ Qalelelani uSomnini, nimomotheke, yeke ubuso benu abusoze badana!

⁷ Nasi isihlupheki esalilako, uSomnini wasizwa, wasisindisa kizo zoke iinhlupheko.

⁸ Abesaba uSomnini, baphahlwa yingilozi mazombe, ibenyule.

⁹ Yizwani benibone bonyana uSomnini muhle, ubusisiwe umuntu ophephela kuye.

¹⁰ Mesabeni uSomnini nina bacwengileko bakhe ngombana abamesabako abasweli litho.

¹¹ Amabhubezana ayadinga abe aphathwe yindlala, kodwana labo abafuna uSomnini abasweli litho.

¹² Nina bantwana, izani nizongilalela, nje-ke ngizonifundisa ukwesaba uSomnini:

¹³ Ngubani kini othanda ukuphila, nofisa amalanga amanengi wokwenama na?

¹⁴ Akalonde ilimu lakhe ekohlakalweni, neembhena zakhe ekukhulumeni ikohliso.

¹⁵ Akahlukane nobumbi, enze okuhle; afune ukuthula akurhuluphele.

¹⁶ Amehlo wakaSomnini aphezu kwabalungileko, neendlebe zakhe zivulekele isililo sabo.

¹⁷ Ubuso bakaSomnini bujibile phezu kweengilamkhuba, uphelisa ukukhunjulwa kwazo ephasini.

¹⁸ Abalungileko nabanesililo, uSomnini uyabezwa, abatjhaphulule kizo zoke iinhlupheko zabo.

¹⁹ USomnini useduze nabanehliziyo ephukileko, usindisa abanommoya odanileko.

²⁰ Zinengi iinhlupheko zolungileko, kodwana uSomnini uyamtjhaphulula kizo zoke;

²¹ alonde woke amathambakhe, kungabikho nelilodwa kiwo elizakwephulwa.

²² Okumbi kuyambulala okhohlakeleko, abazonda olungileko bazakuhlawuliswa.

²³ USomnini uhlenga ipilo yeenceku zakhe; akakho noyedwa ophephela kuye ozakuhlawuliswa.