AMARHUBO 33 - IsiNdebele 2012 Translation

Ubukhulu bakaZimu

¹ Hlokomani kuSomnini nina balungileko! Iye, ukudumisa kungokwabaqotho!

² Dumisani uSomnini ngeharibhana, nimbethele iharibha leenara ezilitjhumi!

³ Mrhubeleni ingoma etja, niyibethe kuhle ngeenara, nihlokome!

⁴ Mbala, ilizwi lakaSomnini liliqiniso, zoke izenzo zakhe zikukwethembeka.

⁵ Uthanda okufaneleko nokulungileko, iphasi ligcwele ukwethembeka kwakaSomnini.

⁶ Ngelizwi lakaSomnini, kwadaleka umkayi, iye, ngokukhuluma kwakhe kwenzeka koke okukiwo.

⁷ Wabuthelela amanzi welwandle kwanga angemgqomini; wabeka amanzi amanengi ngeenlulwini.

⁸ Iphasi loke alimesabe uSomnini; kuthi zoke izakhamuzi ephasini, zithuthumele ngaye

⁹ ngombana wakhuluma, kwadaleka, wayala, kwaba khona.

¹⁰ USomnini uhlangahlanganisa iinhloso zezizwe, araranise amaqhinga wabantu.

¹¹ Iinhloso zakaSomnini zijame isiphelani, iqhinga lakhe lingelanini nanini.

¹² Sibusisiwe isizwe uZimaso kuSomnini, isizwe uSomnini azikhethele bona sibe lilifa lakhe.

¹³ USomnini ubona phasi asezulwini, aqale woke umuntu.

¹⁴ Esihlalweni sakhe uyelela boke bephasi.

¹⁵ Yena owadala iinhliziyo zabo boke, uqaphela zoke izenzo zabo.

¹⁶ Amakhosi akahluli ngobunengi bebutho lawo neengorho azisindi ngobukhulu bamandlazo.

¹⁷ Iinjomani zepi zilithemba elililize ekusindiseni begodu azihlengi ngobukhulu bamandlazo.

¹⁸ Kwamambala, ilihlo lakaSomnini liphezu kwabamesabako, iye, phezu kwabaqalelele ukwethembeka kwakhe,

¹⁹ kobana atjhaphulule ipilwabo ekufeni, abalonde baphilile ngesikhathi sendlala.

²⁰ Umphefumulwethu ulindela uSomnini; yena ulisizo nesihlangu sethu.

²¹ Iinhliziyo zethu zenamile kuye ngombana sithemba ibizo lakhe elicwengileko.

²² Somnini, ukwethembeka kwakho akube phezu kwethu ngombana siqalelele wena.