AMARHUBO 31 - IsiNdebele 2012 Translation

Umthandazo nokudumisa uSomnini ngokusindiswa ezitheni

¹ Kumkhaleli; irhubo lakaDavida.

² Kuwe Somnini, ngiyaphephela, nini nanini ungavumi ngingene ehlazweni ngisindise ngokulunga kwakho.

³ Beka kimi indlebakho, ungenyule masinyana. Yiba lidwala lobuphephelo kimi, ube yindawo yokukhosela kobana ngilondeke.

⁴ Mbala wena ulidwala lami nobuphephelo bami; yeke ngirhole, ungihlahle ngenca yebizo lakho;

⁵ ungikhuphe esithiyweni ebesifihlelwe mina ngombana wena usiphephelo sami.

⁶ Esandleni sakho ngibeka ummoyami, uyangihlenga Somnini, Zimu othembekileko.

⁷ Ngiyabazonda abalotjha abosingazimu abalilize ngombana mina ngethemba uSomnini.

⁸ Ekuthembekeni kwakho ngizakuthaba, ngijabule ngombana ukuhlupheka kwami ukubonile, wanaka iinhlupheko zomphefumulwami.

⁹ Akhange unginikele esandleni sesitha, kunalokho ujamise iinyawo zami endaweni ebanzi.

¹⁰ Somnini, yiba nomusa kimi ngombana ngibandezelekile. Amehlwami avuvukile ngebanga lesizi, umphefumulwami nomzimbami uyanyefa.

¹¹ Mbala, ipilwami ihlala iseenhlungwini neminyakami inesibibithwana, amandlami adambile ngebanga lesono sami, iye, nginyefe ummongo.

¹² Ngibe siphoqo sawo woke amanabami, kibomakhelwana bami khona angisakhulumi, iye, sese ngisisethuso eenhlobeni zami, abangibona ngaphandle bayangibaleka.

¹³ Nginjengofileko: angisakhumbuleki; ngaba ngofana nesitja esephukileko.

¹⁴ Ngizwile abanengi bangihleba, ukwesaba kungizomba mahlangothi woke, lokha nabahlala isicathana ngami. Bahlosa ukungibulala

¹⁵ kodwana mina ngithemba wena Somnini, ngithi: “UnguZimami.”

¹⁶ Esandleni sakho kuneenkhathi zami; ngitjhaphulule esandleni sezitha zami nakilabo abangizumako.

¹⁷ Khanyisa ubuso bakho phezu kwencekwakho; ngisindise ngokwethembeka kwakho.

¹⁸ Somnini, ungavumi ngingene ehlazweni ngombana ngibiza wena. Yenza iinkhohlakali ziphoqeke, ziye endaweni yabafileko zithulile.

¹⁹ Ayithuliswe imilomo ekhuluma amanga, iye, ekhuluma ngokuzazi ngabalungileko nangokuzigqaja nokunyaza.

²⁰ Maye, kuvamile okuhle okwenzako, okulondele labo abakwesabako, okulungisile phambi kwabantu kilabo abaphephela kuwe.

²¹ Ubafihla ekusithekeni kobukhona bakho, ekuhlebeni kwabantu. Ubasitha emtlhatlhanenakho ekuphikisweni kweenkulumo.

²² USomnini akadunyiswe ngombana ungibonisile ukukhathalela kwakhe okumangalisako, lokha nangivinjezelwe njengedorobho.

²³ Mina-ke ngaba namawala ngokuthi: “Ngiqotjhiwe ebusweni bakho, Somnini.” Kodwana wezwa isibawo sokuncenga kwami, lokha nangilila kuwe.

²⁴ Thandani uSomnini noke nina bathembekileko bayo! USomnini uyabalondoloza abaqotho, kodwana ozigqajako umbuyiselela kanzima.

²⁵ Qinani, ihliziywenu ibe nesibindi nina noke eniqalelele kuSomnini.