AMARHUBO 30 - IsiNdebele 2012 Translation

Ukuthokoza kosindiswe ekufeni

¹ Ingoma yokwahlukaniselwa ithempeli; irhubo lakaDavida.

² Ngiyakuphakamisa Somnini ngombana ungenyulile, akhange uvume bonyana izitha zijabule ngami.

³ Somnini, Zimami, ngilile kuwe, wangipholisa.

⁴ Wena Somnini ungenyule endaweni yabafileko, wangihlenga phakathi kwabehlela emgodini.

⁵ Khalelani nidumise uSomnini nina bathembekileko bayo, thokozani ibizo layo elicwengileko

⁶ ngombana itukuthelo kaSomnini ingeyesikhatjhana, kodwana umusayo ungowepilo yoke. Nanyana kungaba nesililo ebusuku, nokho amasa eza nesihleko.

⁷ Ekwenameni kwami mina ngathi: “Angisoze nganyakaziswa.”

⁸ Somnini bekungomusakho kobana ungenze nganzinza njengentaba eqinileko; kodwana lokha nawufihla ubuso bakho, ngathoma ukukakamala.

⁹ Ngalila kuwe Somnini, iye, ngazincengela kuSomandla, ngathi:

¹⁰ “Ingabe kukhona okuzuzako ngokufa kwami, lokha nangehlela emgodini na? Ithuli lona lizakudumisa, lidembe ngokwethembeka kwakho na?

¹¹ Yizwa Somnini, ube nomusa kimi, yiba msizami Somnini!”

¹² Uphendule isililo sami saba ligido, wangihlubulisa izambatho zami zesililo, wangembathisa ukujabula,

¹³ ukuze ngikudumise ngamandla, ngingathuli. Somnini Zimami, ngizakuthokoza nini nanini.