AMARHUBO 3 - IsiNdebele 2012 Translation

Ukulila kokhathaziweko

¹ Irhubo lakaDavida lokha nabalekela u-Absalomu indodanakhe.

² Maye Somnini, izitha zami zinengi! Banengi abangivukelako,

³ iye, banengi abathi kimi: “UZimu angeze amsindise.” Sela

⁴ Wena Somnini usihlangu mazombe kimi, ubuyise isithunzi sami, waphakamisa ihlokwami.

⁵ Ngilila kuSomnini ngelizwi elikhulu; yena ungiphendula asentabenakhe ecwengileko.

⁶ Lokha nangilalako, ngizunywe buthongo; ngivuka ngombana uSomnini ungisingathile.

⁷ Amatjhumi aziinkulungwana wamajoni angiwesabi, iye, lawo angivimbezele nca zoke.

⁸ Sikima Somnini, ungisindise, Zimami! Wawahla zoke izitha zami emhlathini, wephula namazinyo wabakhohlakeleko.

⁹ Ukusindiswa kuvela kuSomnini. Isibusiso sakho asibe phezu kwabantu bakho.