AMARHUBO 29 - IsiNdebele 2012 Translation

Ilizwi lakaSomnini elinamandla

¹ Irhubo lakaDavida. Nina madodana kaZimu, nikelani uSomnini, iye, mnikeleni iphazimulo namandla!

² Nikelani uSomnini iphazimulo yebizo lakhe! Mkhothameleni nembethe izambatho ezicwengileko.

³ Ilizwi lakaSomnini lingaphezu kwamanzi, uZimu wephazimulo uyararambisa; iye, uSomnini ungaphezu kwamanzi amanengi.

⁴ Ilizwi lakaSomnini linamandla; ilizwi lakaSomnini linobukhosi.

⁵ Ilizwi lakaSomnini lephula imithi yemisedari; iye, uSomnini uphohloza imisedari yeLibhanoni.

⁶ USomnini wenza iintaba zitjekule njengekonyana, iye, iLibhanoni neSiriyoni njengekunzana yekukhama.

⁷ Ilizwi lakaSomnini libabela amalangabi womlilo.

⁸ Ilizwi lakaSomnini lizamazamisa irhalawumba; iye, USomnini uzamazamisa irhalawumba leKhadetjhi.

⁹ Ilizwi lakaSomnini lithintitha imithi ye-owuku lenza amahlathi asale awohlokile. Ngesigodlweni sakhe boke bathi: “Iphazimulo!”

¹⁰ USomnini uhlezi ngaphezu kwamanzi wesibhakabhaka; iye, uSomnini uyabusa, uyikosi isiphelani.

¹¹ Kwanga uSomnini anganikela abantu bakhe amandla! Kwanga angababusisa ngokuthula.