AMARHUBO 28 - IsiNdebele 2012 Translation

USomnini ulirharha lesindiso

¹ Irhubo lakaDavida. Ngilila kuwe Somnini, Dwala lami, ungabi njengesithulu kimi ngombana nawuthulileko kimi, ngizakufana nabehlela endaweni yabafileko.

² Yizwa ilizwi lesibawo sami, lokha nangilila kuwe Somnini; iye, lokha nangiphakamisela izandla, endawenakho ecwenge khulu.

³ Ungangirhurhuli nabakhohlakeleko, nabababenzi bobumbi, labo abakhuluma kuhle nabanye abantu, khisibe babakhohlisi eenhliziyweni.

⁴ Bavuze njengokwemisebenzabo, iye, njengobumbi bezenzo zabo; bakhokhele njengokomphumela wezandla zabo, ubabuyisele umvuzwabo, obafaneleko.

⁵ Njengombana banganaki okwenziwa nguSomnini, namkha umsebenzi wezandla zakhe, uSomnini uzabadiliza, angasabavusi.

⁶ Akadunyiswe uSomnini ngombana uzwile ilizwi lokuncenga kwami.

⁷ USomnini umamandlami nesihlangu sami, ihliziywami ithembela kuye; ngalokho ngisizakele nehliziywami isasile; nje-ke, ngengomami ngizamdumisa.

⁸ USomnini umamandla wabantu bakhe, ulirharha lesindiso kozesiweko wakhe.

⁹ Somnini, sindisa abantu bakho, ubusise ilifa lakho; yiba mumelusabo, ubathwale isiphelani.