AMARHUBO 27 - IsiNdebele 2012 Translation

Ukwethembela kuSomnini

¹ Irhubo lakaDavida. USomnini ukukhanya nesindiswami, ngizakwesaba bani na? USomnini ubuphephelo bokuphila kwami; alo, ngizakuba nevalo ngobani na?

² Lokha abenzi bobumbi nabatjhidela kimi kobana bangidle ngiphila, iye, izitha nabajamelani bami, ngibo abakhutjhwa bebawe.

³ Nanyana ibutho lingivimbezela, ihliziywami ayinavalo; nalokha ngivukelwa yipi, nalapho nginethemba.

⁴ Kunye engikubawa kuSomnini begodu ngizakulandelela lokho: Kukobana ngihlale ngekumbeni kaSomnini, amalanga woke wokuphila kwami, nje-ke ngizazizwela umusa kaSomnini nokuhlahlwa ethempelini lakhe.

⁵ Yena uzongibhacisa emtlhatlhanenakhe ngelanga elimbi, angifihle ekusithekeni kwetende lakhe, iye, uzongibeka ekuphakameni phezu kwedwala.

⁶ Yeke ihlokwami iphakamile ngehla kwezitha zami ezingizombelezileko; ngizakunikela iminikelo yokuhlokoma etendeni lakhe, ngizakuvuma, ngidumise uSomnini.

⁷ Ngizwe Somnini lokha nangilila ngelizwi elikhulu; yiba nesirhawu kimi, ungiphendule!

⁸ Ihliziywami ikhumbula bona uthe: “Funani ubuso bami!” Nje-ke, ubuso bakho Somnini, ngizabufuna,

⁹ ngalokho ungabufihli kimi. Ungayiqotjhi incekwakho ngetukuthelo; wena ube lisizo lami, ungangilahli; ungangitjhiyi, wena Zimu wesindiswami.

¹⁰ Ubaba nomma bangangitjhiya, kodwana uSomnini uzangamukela.

¹¹ Somnini, ngifundise indlelakho, ngirhole emzileni olelezekileko ngenca yezitha zami.

¹² Unganginikeleli entandweni yamanabami ngombana abofakazi bamanga bangivukele, iye, bafuthekile ngenturhu.

¹³ Mbala ngiyakholwa bonyana ngizazizwela ukulunga kwakaSomnini ngisesephasinapha.

¹⁴ Qalelela uSomnini, uqine, ihliziywakho ibe nesibindi; iye, qalelela uSomnini.