AMARHUBO 25 - IsiNdebele 2012 Translation

Ukwethembela kuSomnini

¹ Irhubo lakaDavida. Somnini, umphefumulwami uyakulangazelela.

² Zimami, ngithembele kuwe, ungavumeli bona ngingene ehlazweni; ungavumeli izitha zami ziqhanase ngami.

³ Ngambala boke abaqalelele kuwe angeze badaniswa. Labo abakuhlubukako ngelize bazakuhlaziswa.

⁴ Ngazise iindlela zakho Somnini; ungifundise imizilakho.

⁵ Ngikhambisa eqinisweni lakho, ungifundise ngombana wena unguZimu wesindiswami, ngithembele kuwe ngesikhathi soke.

⁶ Somnini, khumbula izenzo zesisa nezokwethembeka kwakho ngombana zibekhona ekadeni.

⁷ Ungakhumbuli izono zobutjha bami namkha iimphambeko zami; ngikhumbule ngokwethembeka kwakho ngebanga lezenzo zakho ezihle.

⁸ USomnini ulungile begodu uqotho, ngalokho ukhombisa izoni indlela.

⁹ Urholela abathobekileko kokulungileko, iye, abathobekileko ubafundisa indlelakhe.

¹⁰ Zoke iindlela zakaSomnini zikukwethembeka, ziliqiniso kilabo abalonda isivumelwano nobufakazi bakhe.

¹¹ Ngebanga lebizo lakho Somnini, colela icala lami ngombana likhulu.

¹² Ngimuphi umuntu owesaba uSomnini na? Yena uzamfundisa indlela azayikhetha.

¹³ Umuntu loyo uzakuhlala aphumelela, isizukulwana sakhe sizakuzuza inarha.

¹⁴ USomnini wenza isikhozi nabamesabako, azise isivumelwano sakhe kibo.

¹⁵ Nini nanini amehlwami ahlala akuSomnini ngombana nguye ophephisa inyawo lami esifwini.

¹⁶ Phendukela kimi Somnini, ube nomusa kimi ngombana nginesizungu, ngihluphekile.

¹⁷ Iinhlupheko zehliziywami zingikhulele, yewungikhuphe esizini lami.

¹⁸ Yelela ukuhlupheka nokubandezelwa kwami, ungicolele zoke izono zami.

¹⁹ Akhusuthi uyaqala, izitha zami zinengi, uqale nelunya ezingizonda ngalo.

²⁰ Londoloza ipilwami, ungenyule; ungavumeli bona ngingene ehlazweni ngombana ngiphephela kuwe.

²¹ Kwanga ubuqotho nokulunga kungangilondoloza ngombana ngiqalelele kuwe, Somnini.

²² Zimu, akhese ukhuphe u-Israyeli kizo zoke iinhlupheko zakhe.