AMARHUBO 24 - IsiNdebele 2012 Translation

USomnini umBusi ohloniphekileko

¹ Irhubo lakaDavida. Iphasi lingelakaSomnini nakho koke okukilo, ilizwe nabakhileko kilo

² ngombana yena walisekela phezu kwamalwandle, walijamisa phezu kwemilambo.

³ Ngubani ongakhuphukela entabeni kaSomnini? Ngubani ongajama endawenakhe ecwengileko na?

⁴ Ngiloyo onezandla ezinganacala, nehliziyo ehlanzekileko, ongakhulumeli butjhilweni ngoSomnini nongafungi ngekohliso.

⁵ Uzakwamukela isibusiso kuSomnini nokulunga kuZimu, omsindisakhe.

⁶ Leso sizukulwana esimfunako; iye, esifuna ubuso bakaZimu wakaJakopo.

⁷ Phakamisani iinhloko zenu, nina masango! Iye, ziphakamiseni nina minyango yekadeni kobana umBusi ohloniphekileko angene!

⁸ Ungubani umBusi ohloniphekileko loyo na? UnguSomnini onamandla noyingorho, iye, nguSomnini oyingorho yepi!

⁹ Phakamisani iinhloko zenu, nina masango! Iye, ziphakamiseni nina minyango yekadeni, kobana umBusi ohloniphekileko angene!

¹⁰ Ungubani umBusi ohloniphekileko loyo na? UnguSomnini uMninimandlawoke; nguye emBusi ohloniphekileko.