AMARHUBO 22 - IsiNdebele 2012 Translation

Isiphorofido ngehlupheko nephazimulo yolungileko

¹ Kumkhaleli; nge-Ayelethi-Hatjharhari irhubo lakaDavida.

² Zimami, Zimami, ungitjhiyeleni na? Kubayini ukude ungangisizi, iye, ukude namezwi wesililo sami na?

³ Zimami, ngilila emini, kodwana awuphenduli nebusuku kodwana angifunyani ukuthula.

⁴ Wena ongocwengileko, uhlezi eembongweni zaka-Israyeli.

⁵ Abobamkhulu bathembela kuwe; bakwethemba, wabasindisa.

⁶ Kuwe balila, wabasindisa; kuwe bathembela, bangadaniswa.

⁷ Mina ngiyipethu nje, angisuye umuntu, ngisithuko sabantu, ngidelelwa zizizwe.

⁸ Boke abangibonako bayanginyefula, bayangikokomeja, bebathintithe iinhloko

⁹ bathi: “Uzinikele kuSomnini, uSomnini akamsindise, amenyule, angithi uyamthanda!”

¹⁰ Somnini, nguwe owangikhupha esibelethweni, wangikhoselisa emabeleni wakamma.

¹¹ Kuwe ngalahlelwa ngisabelethwa, kwasesibelwethweni sakamma, waba nguZimami.

¹² Ungabi kude nami ngombana imbandezelo iseduze begodu akakho ongangisiza.

¹³ Iinkunzi ezinengi zingizombelezile, iye, iinkunzi ezinamandla zeBhatjhani zingibungelele.

¹⁴ Zingikhamisele imilomazo njengengonyama ebhodlako efuna ukudabudabula.

¹⁵ Ngithululiwe njengamanzi, woke amalungami akhwamukile; ihliziywami injengamanyephe, iyancithika ngaphakathi kwami.

¹⁶ Amandlami omile njengedengela, ilimu lami linamathela eensinini zami. Ungilalisa ethulini lokufa.

¹⁷ Izinja zingizombelezile, ijima labenzi bobumbi lingibungelele; izandla neenyawo zami zilinyaziwe,

¹⁸ amathambami ngingawabala woke. Abantwabo bangirhudulele amehlo ngokungikokomeja,

¹⁹ babelana iimpahla zami zokwembatha, benzelana ifumbe ngesambatho sami.

²⁰ Nakunguwe Somninini, ungabi kude; wena Sizo lami, tjhidela masinyana kimi ungisize.

²¹ Sindisa umphefumulwami ekembeni, ipilwami eligugu emandleni wezinja.

²² Ngisindisa emlonyeni wengonyama neempondweni zekukhama! Wangizwa, wangiphendula,

²³ nje-ke ngizakumemezela ibizo lakho kubafowethu, ngikudumise phakathi kwebandla lamakholwa.

²⁴ Nina enesaba uSomnini, mdumiseni, noke nina nzukulwana zakaJakopo, mkhakhaziseni; iye, noke nina nzukulwana zaka-Israyeli, msikimeleni ngokumhlonipha.

²⁵ Mbala uSomnini azange akhe anyaze, namkha adelele ukuhlupheka kodududu; akhange afihle ubuso bakhe kuye, kodwana umzwile lokha nalila kuye.

²⁶ Somnini, kuwe kuvela ukudumisa kwami ebandleni elikhulu! Ngizaziphumelelisa iinthembiso zami phambi kwabayesabako.

²⁷ Abathobekileko bazakudla basuthe. Abafuna uSomnini bazamdumisa bathi: “Uyaphila!” Iinhliziyo zenu ngesikhathi soke

²⁸ zizakukhumbula. Boke abasemaphethelweni wephasi bazakuphendukela kuSomnini. Iye, zoke iinkoro zezizwe zizakhothama phambi kwakhe

²⁹ ngombana umbuso ungowakaSomnini obusa phezu kwezizwe,

³⁰ iye, yena yedwa. Boke abamajadu bazamkhothamela; phambi kwakhe boke abafako bazakuguqa. Onganapilo uzakuvuseleleka!

^31-32 Iinzukulwana zizakulotjha uSomnini, imindeni ezako ibikelwe ngoSomandla; ukuhlula kwakhe kuzakutjelwa abangakabelethwa, kuthiwe: “Lokhu kwenziwa nguSomnini!”