AMARHUBO 21 - IsiNdebele 2012 Translation

UZimu uvikela ikosi yeJerusalema

¹ Kumkhaleli; irhubo lakaDavida.

² Zimu, emandlenakho ikosethu iyathaba, ekuhluleni kwakho idumisa ngamandla!

³ Iye, uyiphile isifiso sehliziywayo nesibawo seembhena zayo akhange usigodle.

⁴ Uyihlangabeze ngeembusiso ezihle, wayithwesa isihlohlo segolidembala.

⁵ Yabawa ukuphila kuwe, wayinikela khona; iye, wayipha amalanga amanengi, isikhathi eside.

⁶ Idumo layo likhulu ngenca yokuhlula kwakho, ubeke ukuhlonitjhwa nobukhosi phezu kwayo.

⁷ Mbala, ubeke kiyo iimbusiso nini nanini, wayijabulisa khulu ngobukhona bakho.

⁸ Ngebangelo ikosi yethemba uZimu, nje-ke, ngokwethembeka kwakaZimu ongoPhezulu, angeze yazanyazanyiswa.

⁹ Ngwenyama, isandla sakho sizozifunyana zoke izitha zakho; sokudla sakho sizabafunyana abakuzondako.

¹⁰ Lokha nawubonakalako, uzazenza zibe njengekehla yomlilo. UZimu uzaziginya ngelaka lakhe, ziqothulwe mlilo.

¹¹ Inzalwazo uzoyitjhabalalisa ephasini, iye, isizukulwana sazo hlangana nabantu.

¹² Lokha nazikuphendukela ngobumbi, zikubophele izungu, angeze zaphumelela.

¹³ Mbala, uzazenza zibaleke, lokha nawuzinemba ngemisebakho ebusweni bazo.

¹⁴ Phakama Zimu, emandlenakho! Thina sizakuvuma, sidumise imisebenzakho emikhulu.