AMARHUBO 20 - IsiNdebele 2012 Translation

Iimfiso ezihle ngekosi yakwa-Israyeli

¹ Kumkhaleli; irhubo lakaDavida.

² Kwanga uSomnini angakuphendula ngesikhathi sokubandezelwa, ibizo lakaZimu wakaJakopo likuvikele.

³ Inga angakuthumelela isizo elisuka endaweni ecwengileko, akusekele aseZiyoni;

⁴ akhumbule yoke iminikelwakho, amukele imihlabelwakho yokutjhiswa.

⁵ Inga angakupha okufiswa yihliziywakho, aphelelise woke amaswakho.

⁶ Kwanga singahlokoma ngokuhlula kwakho, siphakamise itshwayo ebizweni lakaZimu; iye, inga uSomnini angaphumelelisa zoke iimbawo zakho.

⁷ Nje-ke mina ngiyazi bona uSomnini usiza ozesiweko wakhe, amuphe ipendulo asezulwini lakhe elicwengileko, ngesindiso enamandla evela ngesandleni sakhe sokudla.

⁸ Abanye baqina ngeenkarana zepi, abanye ngeenjomani, kodwana thina siqina ngebizo lakaSomnini uZimethu.

⁹ Abanjalo bazakuguqa, bawe, kodwana thina sizakusikima, sijame.

¹⁰ Somnini, yipha ikosethu ukuhlula! Usiphendule lokha nasilila kuwe.