AMARHUBO 19 - IsiNdebele 2012 Translation

Ukudunyiswa kobukhosi bakaZimu

¹ Kumkhaleli; irhubo lakaDavida.

² Isibhakabhaka sibika iphazimulo kaZimu iye, umkayi umemezela umsebenzi wezandla zakhe.

³ Ilanga libikela elinye umlayezo nobusuku bulandisa obulandelako ngelwazi.

⁴ Nanyana kungekho ikulumo namezwi nelizwi lazo lingazwakali,

⁵ umlayezwazo urhatjheka iphasi loke nombikwazo emaphelelweni womhlaba, ukuya phezulu etendeni lelanga.

⁶ Ilanga linjengomkhwenyana naphuma ngelawini lakhe, lithaba njengengorho ekhamba ibanga layo.

⁷ Liphuma ngakelinye ihlangothi lesibhakabhaka, libuyele emuva ngakelinye. Akukho okungafihleka ekutjhiseni kwalo.

⁸ Umthetho kaSomnini uphelele, uvuselela ipilo. Ubufakazi bakaSomnini buthembekile, bunikela ubuhlakani kabanganalwazi.

⁹ Ifundiso kaSomnini ilungile, yenamisa ihliziyo. Imiyalo kaSomnini imsulwa, ikhanyisa amehlo.

¹⁰ Ukuzithoba kuSomnini kuhlambulukile kunzinzile ngeenkhathi zoke. Iingwebo zakaSomnini ziliqiniso, zifanelekile.

¹¹ Koke lokho kuthandeka ukudlula igolide, iye, ukudlula igolidembala elinengi. Kunandipha ukudlula iinyosi, iye, ukudlula iliju lesihlaka.

¹² Incekwakho nayo ilulekwa ngikho; ukukulonda lokho kunomvuzo omkhulu.

¹³ Akakho noyedwa owazi imitjhapho efihlakeleko; nje-ke, Somnini, ungangibethi ngebanga lemitjhapho leyo!

¹⁴ Khandela incekwakho ingenzi izono ngabomu. Ungazivumeli zingibuse. Khona ngizahlala ngimsulwa begodu nginganacala lesiphambeko esikhulu.

¹⁵ Sengathi amezwi womlomami nemikhumbulo yehliziywami ingamukeleka kuwe Somnini, Dwala lami nomHlengami.