AMARHUBO 18 - IsiNdebele 2012 Translation

Ukuthokoza uZimu ngeembusiso zakhe

¹ Kumkhaleli; irhubo lakaDavida, inceku kaSomnini. UDavida wakhuluma amezwi wengoma le lokha uSomnini namsindisa esandleni sazo zoke izitha zakhe ngitjho nakuSawula.

² Wathi: Ngiyakuthanda Somnini, umamandlami.

³ USomnini ulidwala lami, isiphephelo nomsindisami. UZimami ulirholo lami engiphephela kilo; usihlangu sami namandla wesindiswami. Usiqongolo sami

⁴ ufanele ukudunyiswa: Nangilila kuSomnini, ngisindiswa ezitheni zami.

⁵ Ngenganyelwa misinga yokufa, iinkhukhula ezibhubhisako zangethusa.

⁶ Iinkawule zezindla bezingirarele; ngabandamelwa zizifu zokufa.

⁷ Ematlhuwenami ngalilela uSomnini, ngarhuwelela uZimami. Wezwa ilizwi lami asesigodlweni sakhe, ukulila kwami kuye kwafika eendlebeni zakhe.

⁸ Iphasi ladedemela begodu lahlengezela, iinsekelo zeentaba zasikinyeka, zathuthumela ngombana gade asilingekile.

⁹ USomnini nasilingekileko ufana nentabamlilo ethunya intuthu nekhafula amalangabi nekehla.

¹⁰ Wavula amazulu wehlela phasi; ngaphasi kweenyawo zakhe bekunamafu anzima tshu.

¹¹ Kwaba ngathi uphapha ngekerubhi, ebeliphapha belithiyelele emaphikweni wommoya.

¹² Ubumnyama wabenza isigubuzeso sakhe, ubusithelo bakhe baba mamafu anzima wezulu.

¹³ Ebuphaziphazini bobukhona bakhe kwakhithika isinanja emafini, kwamekeza nemibani.

¹⁴ USomnini uyaduma usemafini, kwezwakala ilizwi lakaZimu ongoPhezulu.

¹⁵ Wadubula imisubela kwaphadlhalala izitha, waphosa imibani kwahlangahlangana amanaba.

¹⁶ Somnini, lokha nawuvuthela ummoya ngeempumulo, ukuzika kwelwandle kwambuleka; iinsekelo zephasi zanekeka ebaleni ngebanga lokukhalima kwakho.

¹⁷ Welula isandla sakhe aphezulu, wangidzwebula; wangenyula emagwimbini wamanzi.

¹⁸ Wangisindisa esitheni sami esinamandla nakilabo abangizondako bangigabisela ngeenkhwepha.

¹⁹ Bangithelekela ngelanga lami lehlekelele, kodwana uSomnini waba msekelami.

²⁰ Wangikhupha emkghothweni wangibeka etjhatjhalazini, wangisindisa ngombana angithanda.

²¹ USomnini wangivuza ngombana nginganamlandu; wangikhokhela ngombana nginezandla ezimsulwa.

²² Iye, ngilondile iindlela zakaSomnini; azange ngenze okumbi ngokuhlanuka uZimami.

²³ Ngihlala ngikhumbula imithethwakhe; azange ngilahle iimiso zakhe.

²⁴ Bengisoloko ngimsulwa kuye, ngizilondile esonweni.

²⁵ USomnini wangivuza ngombana nginganamlandu, ngokuya ngobumsulwa bezandla zami phambi kwakhe.

²⁶ Somnini, uziveza uthembekile kabathembekileko, uziveza umsulwa kabamsulwa,

²⁷ nakohlanzekileko uziveza uhlanzekile, kodwana koneengwegwe uzibonakalisa uliqili.

²⁸ Iye, wena usindisa abazithobileko, abazigqajako ubehlise.

²⁹ Mbala, Somnini, nguwe okhanyisa isibani sami, utjhugulula ubumnyama engikibo ubenze ukukhanya.

³⁰ Ngesizo lakho ngingathelekela ibutho, ngoZimami ngingeqa umthangala wedorobho.

³¹ UZimu lo, ngoneendlela ezipheleleko, ilizwi lakaSomnini alisoleki. USomnini usihlangu sabo boke abaphephela kuye.

³² Ngubani uZimu ngaphandle kwakaSomnini? Ngubani idwala ngaphandle kwakaZimu na?

³³ NguZimu ongihlomisa ngamandla nowenza indlelami iphephe.

³⁴ Uqinisa imilenzami njengeyehlangumataka angenze ngijame ngokuphepha eenqongolweni.

³⁵ Ubandulela izandla zami ukulwa, imikhonwami ikghona ukugoba umsebe wekoporo.

³⁶ Ukungisekela kwakho kube sihlangu kimi, isandla sakho sokudla singilondile nawuphendula imithandazwami ngiqina idolo.

³⁷ Ugangadela indlelami bonyana ngingatshinyeki iingogoriyana.

³⁸ Ngagijimisa izitha zami ngazifunyana; azange ngijike zingakafi nya.

³⁹ Ngaziphihliza zangasavuka; zarabhalala ngaphasi kweenyawo zami.

⁴⁰ Wangihlomisa ngamandla wokulwa, wathobisa amanabami phambi kwami.

⁴¹ Wenza izitha zami zifulathele ipi, ngarhayila abangizondako.

⁴² Barhuwelela bafuna isizo, kodwana bangaba nomsizi. Balilela uSomnini, kodwana azange abaphendule.

⁴³ Ngabatshidlha basileka kwanga ziintuli emmoyeni; ngabagadanga njengedaka leendledlana.

⁴⁴ Somnini, ungisindisile nangisahlelwa babantu, wangenza ngaba yihloko yezizwe ezitjhili. Abantu bakosobantu bayangikhothamela,

⁴⁵ nabezwako ngami, bayangithobela, imiqhamuka iyazincengela.

⁴⁶ Imiqhamuka iyakoropana, iza itatazela kusukela esiphephelweni sayo.

⁴⁷ USomnini uyaphila! Alidunyiswe idwala lami! Akaphakanyiswe uZimu omsindisami!

⁴⁸ UnguZimu ongibuyiselelako, obeka izizwe ngaphasi kwami,

⁴⁹ ongithukulula ezitheni zami. Mbala, ungiphakamisa ngaphezu kwabajamelani bami, angihluthule ebantwini benturhu.

⁵⁰ Ngalokho ngizakudumisa Somnini, hlangana nezizwe; ngibhine iindumiso ebizweni lakho.

⁵¹ UZimu unikela ikosi ayibekileko ukuhlula okukhulu; akhombise ukwethembeka kozesiweko wakhe, iye, kuDavida neenzukulwana zakhe isiphelani.