AMARHUBO 17 - IsiNdebele 2012 Translation

Umthandazo wokusizwa ekuzunyweni zizitha

¹ Umthandazo kaDavida. Akhese ulalele, wena Somnini ogcina ukulunga! Beka indlebakho esililweni sami, uzwe umthandazwami, ovela eembheneni ezinganakohliso.

² Ilungelo lami alivele kuwe, amehlwakho abone okuliqiniso.

³ Lokha nawuzizinya ihliziywami nalokha nawungihlolisisako ebusuku, iye, nawungihlahlubako angeze ufunyane ihlazo kimi: Umlomami awuphambuki.

⁴ Mayelana nezenzo zabantu: Ngokwamezwi womlomakho ngiyelele iindlela zobudlova.

⁵ Yeke, amagadangwami anamathele emitlhalenakho; iinyawo zami akhange zitjhelele.

⁶ Mina ngibiza wena Zimu ngombana uzangiphendula, beka indlebakho kimi, uzwe amezwami.

⁷ Tjengisa ukukhathalela kwakho okumangalisako. Wena usindisa ngesandla sakho sokudla labo abafuna isiphephelo ebajamelanini babo.

⁸ Ngilonde njengehlavu yelihlo, ungifihle emthunzini wamaphikwakho,

⁹ iye, ungifihle eenkhohlakalini ezinenturhu kimi, okuzizitha zepilwami ezingizombileko.

¹⁰ Zivale iinhliziyo zazo esirhawini, imilomazo ikhuluma ngokuzitjhaya.

¹¹ Zilandelele umtlhalami, nje-ke sezingizombile; amehlwazo anqophe ukungirabhalalisa.

¹² Zinjengamabhubezi arhalele ukudabudabula inyamazana nanjengamabhubezana akhukhuthako.

¹³ Sikima Somnini! Qalana nazo, uziguqise! Ngesabulakho sindisa ipilwami eenkhohlakalini,

¹⁴ iye, Somnini, ngesandla sakho ebantwinabo. Ababulalako abanapilwede, lokho kusisabelo sabo epilweni ngombana uzalisa izisu zabo ngesibetho obabekele sona. Abantwababo bazakusutha ngaso bebanikele iinzukulwana zabo iinsalela.

¹⁵ Kodwana mina ngizazizwela ubukhona bakho ngisendawenakho yokulunga. Lokha nangivukako ngizakwaneliswa kuzibonakalisa kwakho.