AMARHUBO 16 - IsiNdebele 2012 Translation

USomnini uvikela othembekileko wakhe

¹ IMikitamu lakaDavida. Ngivikela Zimu ngombana ngiphephela kuwe.

² Mina ngathi kuSomnini: “Wena uyiKosami, anginakho okuhle ngaphandle kwakho.”

³ Abosingazimu enarheni, labo okuthiwa ngabanamandla, angikareki nakancani ngabo.

⁴ Abazikhethela abosingazimu bazandisela isizi; angeze nganikela kibo iminikelo yeengazi, namkha ngiphathe amabizwabo ngeembhena zami.

⁵ USomnini usisabelo sami, iye, ulilifa lami nekaphami, wena Somnini ungilondele ifumbe yami.

⁶ Ngisikelwe umkhawulo eendaweni ezihle, iye, ilifa elinganelisako.

⁷ Ngidumisa uSomnini ongilulekako, ngitjho nebusuku ihliziywami iyangikhalima.

⁸ Ngesikhathi soke ngibeka uSomnini phambi kwami njengombana angesidleni sami angeze nganyakaziswa.

⁹ Ngalokho ihliziywami yenamile; ngihlokoma ngamandla ngombana umzimbami ulondekile.

¹⁰ Esikhundleni sokobana ungilahlele endaweni yabafileko, namkha uvumele othembekileko wakho abone ithuna,

¹¹ wena ungikhombisa indlela yokuphila. Ukujabula okwanelisako kuphambi kwakho nokwenama kungesidleni sakho isiphelani.