AMARHUBO 148 - IsiNdebele 2012 Translation

Indalo ayidumise uSomnini

¹ Haleluya! Dumisani uSomnini nina enisezulwini, nimdumise kweliphezulu!

² Mdumiseni nina ngilozi zakhe, iye, mdumiseni noke nina butho lakhe!

³ Mdumiseni nina langa nenyanga, mdumiseni noke nina nkwekwezi eziphazimako!

⁴ Mdumiseni nina mazulu aphakamileko, nani manzi angehla komkayi!

⁵ Koke lokho akudumise ibizo lakaSomnini, ngombana wayala kwadaleka.

⁶ Lokho wakujamisa isiphelani, wakubekela isimiso esingapheliko.

⁷ Dumisani uSomnini nina enisephasini, nina mbandana ezikulu zemanzini, nani kuzika kwamalwandle,

⁸ nawe mbani nesinanja, liqhwa nawe kungu, nawe mmoya owenza umyalwakhe.

⁹ Iye, dumisani nina ntaba nemibundu yoke, nina mithi yeenthelo nemisedari yoke,

¹⁰ mbandana nawe fuyo yoke, nrharhabi nani nyoni.

¹¹ Dumisani nina makhosi wephasi nani noke zizwe, nina nkhulu nani noke babusi benarha,

¹² nina masokana neentombi, nani abadala nabancani.

¹³ Koke lokho akudumise ibizo lakaSomnini, ngombana libizo lakhe lodwa eliphakamileko; iphazimulwakhe ingehla kwephasi nezulu.

¹⁴ Uvusele abantu bakhe isithunzi, idumo kwabathembekileko bakhe boke, iye, kuma-Israyeli, okubabantu abasehliziywenakhe. Haleluya!