AMARHUBO 147 - IsiNdebele 2012 Translation

UZimu ulawula indalo

¹ Haleluya! Kuhle ukurhubela uZimethu! Maye kumnandi kangangani! Iye, indumiso imfanele!

² Umakhi weJerusalema nguSomnini, ubuthelela abahlakazekileko bakwa-Israyeli.

³ Uphulukisa abaneenhliziyo ezaphukileko, abophe amancebabo.

⁴ Ubala inani leenkwekwezi, abize enye nenye ngebizo layo.

⁵ IKosethu yikulu, namandlayo makhulu, ukwazi kwayo akulinganiseki.

⁶ USomnini usekela abathobekileko, athobise abakhohlakeleko.

⁷ Vumelani uSomnini ngokuthokoza, nikhalelele uZimethu ngeharibhana!

⁸ Yena osibekela umkayi ngamafu, alungiselele izulu kobana line ephasini, ahlumise utjani eentatjaneni.

⁹ Unikela iinlwana ukudla kwazo, ngitjho namadzinyani wegubulu nalilako.

¹⁰ Ukuthaba kwakhe akukho emandleni wenjomani, namkha ukujabula kwakhe eenthumbeni zendoda.

¹¹ USomnini uthaba ngabamesabako, iye, abaqalelela ukwethembeka kwakhe.

¹² Babaza uSomnini, wena Jerusalema, udumise uZimakho, wena Ziyoni,

¹³ ngombana yena uqinisa iinqabo zamasangwakho, abusise abantwabakho abangaphakathi kwakho.

¹⁴ Wenza ukuthula ngemikhawulwenakho, akwanelise ngamabele anonileko.

¹⁵ Uthumela umyalwakhe ephasini, ilizwi lakhe ligijima ngebelo.

¹⁶ Wendlala iliqhwa inga buboya, arhatjhe isithwathwa njengomlotha.

¹⁷ Wehlisa isinanja sakhe njengeroro. Alo, ngubani ongajama phambi kwamakhazakhe na?

¹⁸ Uthumela ilizwi lakhe lincithikise isinanja, avuse ummoyakhe, amanzi ageleze.

¹⁹ Wembula ilizwi lakhe kuJakopo, imithetho neemiso zakhe ku-Israyeli.

²⁰ Asikho isizwe akhe enza njalo kiso; imithethwakhe ayaziwa kiso. Haleluya!