AMARHUBO 146 - IsiNdebele 2012 Translation

Ukudumisa uZimu olungileko

¹ Haleluya! Dumisa uSomnini mphefumulwami!

² Iye, ngizakudumisa uSomnini ipilwami yoke, ngivumele uZimami qobe ngisekhona.

³ Ningabeki ithemba lenu eenkhulwini, iye, emuntwini obhubhako okungekho kuye ukusindisa.

⁴ Lokha umphefumulwakhe nawuphumako, yena ubuyela ehlabathini; khona mhlokho aphele amaqhingakhe.

⁵ Ubusisiwe umuntu omsizakhe unguZimu kaJakopo, loyo ithemba lakhe likuSomnini uZimakhe,

⁶ owenza izulu nephasi, ilwandle nakho koke okukikho, olonda iqiniso isiphelani,

⁷ owenzela abagandelelweko ubulungiswa nopha abalambileko ukudla. USomnini utjhaphulula iimbotjhwa;

⁸ uSomnini uvula amehlo wabaphopheleko, aphakamise abathotjisiweko, athande abalungileko.

⁹ USomnini ulonda iinkhonzi, asekele iintandani nabahlolokazi; kodwana indlela yeenkhohlakali uyayiphambanisa.

¹⁰ USomnini uzakubusa isiphelani, iye, uZimakho, wena Ziyoni, iinzukulwana ngeenzukulwana. Haleluya!