AMARHUBO 145 - IsiNdebele 2012 Translation

Ubukhulu nokulunga kwakaZimu

¹ Indumiso kaDavida. Ngiyakuphakamisa Zimami, wena Somnini, ngidumisa ibizo lakho nini nanini.

² Imihla ngemihla ngizakudumisa, ngibabaze ibizo lakho nini nanini.

³ USomnini mkhulu, kufuze adunyiswe khulu; ubukhulu bakhe abuphenyeki.

⁴ Isizukulwana sizakubabaza imisebenzakho kesinye, simemezele izenzo zakho zamandla.

⁵ Ngizakuzindla ngephazimulo yokuhlonitjhwa kobukhosi bakho kanye neemangaliso zakho.

⁶ Abantu bazakumemezela amandla wokwesabeka kwakho; nami ngizakufakaza ubukhulu bakho.

⁷ Bazakwendlala idumo lobunengi bobuhle bakho, bahlokome ngokulunga kwakho,

⁸ bathi: “USomnini unomusa nesirhawu; ubuthaka ekusilengekeni nokwethembeka kwakhe kukhulu.

⁹ USomnini ulungile kibo boke nesisa sakhe sengamele koke akudalileko.”

¹⁰ Yoke imisebenzakho izakuthokoza, Somnini nabathembekileko bakho bazakubabaza.

¹¹ Bazakhuluma ngephazimulo yombuswakho, bamemezele izenzo zakho zamandla,

¹² bazise abantu izenzo zakho zamandla nokuhlonitjhwa kwephazimulo yombuswakho.

¹³ Umbuswakho, umbuso wesiphelani nokubusa kwakho kuhlezi iinzukulwana zoke. USomnini uthembekile emezwinakhe woke nezenzweni zakhe zoke unesisa.

¹⁴ Boke abawako uSomnini uyababamba, aphakamise boke abathotjisiweko.

¹⁵ Woke amehlo aqalelele kuwe begodu ubapha ukudla ngesikhathi esifaneleko.

¹⁶ Uvula izandla zakho, wanelise iimfiso zakho koke okuphilako.

¹⁷ USomnini ulungile eendleleni zakhe zoke, unesisa kikho koke akwenzako.

¹⁸ USomnini useduze nabo boke abambizako, iye, boke abambiza ngeqiniso.

¹⁹ Uzalisa iimfiso zabo boke abamesabako, alalele isililo sabo abasindise.

²⁰ USomnini ulonda boke abamkhathalelako, kodwana uzakubhubhisa zoke iinkhohlakali.

²¹ Umlomami uzakukhuluma idumo lakaSomnini nenyama yoke izakudumisa ibizo lakhe elicwengileko nini nanini.