AMARHUBO 144 - IsiNdebele 2012 Translation

USomnini ulidwala nobuphephelo

¹ Irhubo lakaDavida. Akadunyiswe uSomnini olidwala lami, yena obandulela izandla zami ipi neminwami ukulwa.

² USomnini ulidwala nobuphephelo bami, irharha nomsindisami; usihlangu sami engiphepha ngaso, uthobisa abantu bami ngaphasi kwami.

³ Somnini, umuntu bekayini kobana umnake, namkha obhubhako kobana umkhumbule?

⁴ Umuntu ufana nomphefumulo nje; imihlakhe ifana nesithunzi esinyamalalako.

⁵ Somnini, vula amazulu, wehlele phasi; thinta iintaba ukuze zithunye intuthu.

⁶ Phazimisa imibani, uphadlhalaje izizwe; thumela imisubelakho, uzihlangahlanganise.

⁷ Yelula isandla sakho uphezulu; ngisindise bewungenyule emanzini amanengi, iye, ezandleni zabatjhili,

⁸ abanemilomo ekhuluma amala nabanesidla sekohliso.

⁹ Ngizakuvuma ingoma etja kuwe Zimu; ngikubethele iharibha leenara ezilitjhumi!

¹⁰ Nguwe opha amakhosi ukuhlula nosindisa uDavida incekwakho esabuleni yesihluku.

¹¹ Iye, ngisindise bewungenyule ezandleni zabatjhili abanemilomo ekhuluma amala nabanesidla sekohliso!

¹² Kwanga amadodanethu ebutjheni bawo angafana nesimila esikhula kuhle; amadodakazethu afane neensika zesikghudlhu ezibazwe njengezesigodlweni.

¹³ Kwanga iinlulu zethu zingaphuphuma ngemihlobohlobo yemikhiqizo; izimvu neembuzi zethu zande ngeenkulungwana, iye, ngeenkulungwana ezilitjhumi emirhuleni yamadlelwethu;

¹⁴ kwanga neenkomo zethu zingamitha. Kungabi nomphundlukelo emithangalenethu, kungabi nesililo sesizi eendledlaneni zethu.

¹⁵ Babusisiwe abantu abehlelwa ngilokho, iye, babusisiwe abantu uZimabo onguSomnini.