AMARHUBO 143 - IsiNdebele 2012 Translation

Umthandazo wokulilela kuSomnini

¹ Irhubo lakaDavida. Somnini, yizwa umthandazwami ngobuqotho bakho; beka indlebe esibaweni sami, ungiphendule ngokulunga kwakho.

² Incekwakho ungayimangaleli, ngombana akunamuntu ophilako ongolungileko phambi kwakho.

³ Mbala, isitha sizumene nami, sagandelela phasi ipilwami, sangihlalisa ebumnyameni njengalabo esele bahlongakala kade.

⁴ Ngalokho ummoyami ngaphakathi kwami udambile; ihliziywami inevalo.

⁵ Ngakhumbula imihla yekadeni, ngazindla ngemisebenzakho yoke, ngayelela okwenziwe zizandla zakho.

⁶ Nje-ke ngelulela izandla zami kuwe; umphefumulwami womele wena njengenarha elibhudu.

⁷ Somnini, ngiphendule masinyana; ummoyami ulangazelela wena. Ungabufihli ubuso bakho kimi ukuze ngingafani nabawela ngemgodini.

⁸ Ngizwise ukwethembeka kwakho ekuseni, ngombana kuwe ngibeka ithemba lami. Ngikhombise indlela ekufuze ngikhambe ngayo, ngombana umphefumulwami uyakulangazelela.

⁹ Somnini, ngenyule ezitheni zami; kuwe ngibeka ithemba lami.

¹⁰ Ngifundise ukwenza intandwakho, ngombana wena unguZimami. UMoyakho olungileko akangirhole, angikhambise ehlabathini elelezekileko.

¹¹ Ngebanga lebizo lakho, Somnini, londa ipilwami. Iye, ngokulunga kwakho ngikhuphe ematshwenyekweni.

¹² Ngokuthembeka kwakho phelisa izitha zami, bewubhubhise boke abajamelani bami, ngombana ngiyincekwakho.