AMARHUBO 141 - IsiNdebele 2012 Translation

Umthandazo wokulondwa ebumbini

¹ Irhubo lakaDavida. Somnini, ngilila kuwe, yewungitjheje; beka indlebe elizwini lami nangilila kuwe.

² Umthandazwami awube njengetjhwalo kuwe; izandla engiziphakamisileko zibe njengomnikelo wakusihlwa.

³ Somnini, bekela umlomami umlindi; ulonde umnyango weembhena zami.

⁴ Ungavumeli ihliziywami iphendukele ebumbini kobana ngizibandakanye ezenzweni zobukhohlakali ngokuhlanganyela nabantu abenza ubumbi. Ungavumi ngidle iinkhanakhana zabo.

⁵ Nange ngiwakalwa nguwe wena olungileko bekungaba yinto ehle; nakube ngikhalinywa nguwe bekuzakuba njengokuzeswa ngamafutha. Ungavumi ihlokwami ikwale lokho, kodwana umthandazwami awuhlale ujamelene nobumbi beenkhohlakali.

⁶ Nanyana abarholi bazo bebangasunduzelwa ngerharheni, bebazakuzwa kobana amezwi womthandazwami mahle.

⁷ Lokha amathambethu narhatjheka emlonyeni wethuna njengamasoyi wolimako natlaya ihlabathi,

⁸ amehlwami ahlala akuwe Somnini, Somandla; iye, kuwe ngiyaphephela, ungangingeniseleli ngengozi.

⁹ Ngiphephise ekubanjweni sisifu abangithiye ngaso, iye, eenthiyweni zeengilamkhuba.

¹⁰ Iinkhohlakali aziwele ezifini zazo, lokha mina ngedwa nangiphunyurhako.