AMARHUBO 140 - IsiNdebele 2012 Translation

Ukubawa isindiso kuSomnini

¹ Kumkhaleli; irhubo lakaDavida.

² Somnini ngisindise eenkhohlakalini, ngivikele ebantwini benturhu;

³ labo abahlela okumbi eenhliziyweni zabo nabaphehla ipi isikhathi soke.

⁴ Balola ilimu labo libe bukhali njengelenyoka, eembheneni zabo kunesihlungu serabi.

⁵ Ngilonde, Somnini, ezandleni zeenkhohlakali; ngivikele ebantwini benturhu, iye, labo abasophe ukungirareja.

⁶ Abazigqajako bangifihlele isifu, bangibekela iinrhobelo zeentambo; iye, endleleni yoke bangibekela iinthiyo.

⁷ Ngathi kuSomnini: “Wena unguZimami! Beka iindlebe elizwini lesibawo sami.

⁸ Somnini, Somandla, msindisami onamandla, usithe ihlokwami ngelanga lepi.

⁹ Nje-ke Somnini, ungaphumelelisi iimfiso zeenkhohlakali, ungavumeli zifikelele ihlelo lazo elimbi. Baphakamisa

¹⁰ iinhloko labo abangizombileko! Ingozi abayikhulumako ayibagubuzese!

¹¹ Kwanga amalahle avuthako angawela phezu kwabo, baphoselwe emlilweni, iye, ngemgodini bangasaphuma!

¹² Ungavumeli onelimu alibhade enarheni; ubumbi abuzumane nomuntu onenturhu.”

¹³ Ngiyazi bona uSomnini uyabamela abadududu avikele ilungelo labakhwahlileko.

¹⁴ Mbala, abalungileko bazakuthokoza ibizo lakho, Somnini nabaqotho bazakuphila ebukhoneni bakho.