AMARHUBO 14 - IsiNdebele 2012 Translation

Ukukhohlakala kwabantu

¹ Kumkhaleli; irhubo lakaDavida. Iindlhayela zizitjela zithi: “UZimu akakho.” Zikhohlakele, zenza izinto ezinyenyisako; akakho noyedwa owenza okulungileko.

² USomnini usezulwini uyabaqala abantu bephasini ukubona bonyana kukhona ohlakaniphileko, orhuluphela uZimu na.

³ Kodwana boke baphambukile, boke bonakele ngokufanako; akakho noyedwa owenza okulungileko, akakho ngitjho namunye.

⁴ Kanti boke abenzi bobumbi abalemuki na? Labo abatla abantu bami inga badla isikwa, abambizi uSomnini.

⁵ Nje-ke bazakuba nevalo khulu ngombana uZimu usesizukulwaneni esilungileko.

⁶ Nina nkhohlakali, isiqhema sabadududu ningasihlazisa, kodwana uSomnini usiphephelo songanalitho.

⁷ Kwanga isindiso ka-Israyeli ingavela eZiyoni! Lokha uSomnini natjhugulula ubujamo babantu bakhe, uJakopo uzakurhuwelela ngethabo, iye, u-Israyeli uzakujabula.