AMARHUBO 139 - IsiNdebele 2012 Translation

UZimu wazi koke

¹ Kumkhaleli; irhubo lakaDavida. Somnini, ungiphenyile, uyangazi.

² Wena wazi ukuhlala nokuvuka kwami, ulemuka imizindlwami ukude.

³ Uhlolisisa ikhambo nokuzigedla kwami, wazana neendlela zami zoke.

⁴ Ngitjho ilizwi lingakabi semlonyenami, wena Somnini, ulazi ngokupheleleko.

⁵ Ungiphahle ngaphambili nangemuva nesandla sakho singehla kwami.

⁶ Ukwazi okunjalo kuyangimangalisa, kuphakeme khulu, angikufikeleli.

⁷ Ngizakuyaphi kude noMoyakho? Ngizakubalekelaphi kude nebukhoneni bakho na?

⁸ Lokha nangikhuphukela emazulwini, wena ulapho! Lokha nangendlala umkghadami endaweni yabafileko, wena ukhona!

⁹ Lokha nangithatha amaphiko wokusa, ngidoyele emikhawulweni yelwandle,

¹⁰ nalapho isandla sakho sizangirhola, isidla sakho singisingathe.

¹¹ Lokha nabe ngingathi, “Ubumnyama abungibhudungele, ukukhanya okungizombileko kube busuku”

¹² nobumnyama abuzukuba mnyama kuwe; ubusuku buzakukhanya njengemini, iye, ubumnyama bufane nokukhanya.

¹³ Nguwe owadala iimbindi zami, wangeluka esibelethweni sakamma.

¹⁴ Ngiyakudumisa ngesimangaliso esesabekako sokuba khona kwami! Iye, imisebenzakho iyamangalisa; lokho ngikwazi kuhle khulu!

¹⁵ Amathambami bekangakafihleki kuwe lokha nangibunjwa ekusithekeni. Lokha ngelukwa ekuzikeni kwesibeletho,

¹⁶ amehlwakho angibona ngisese lihlwili. Koke ukubunjwa kwami kwatlolwa encwadinakho, iye, azange kwatjhiywa nalinye ilanga lakhona.

¹⁷ Zimu, amaqhingakho abudisi kimi! Inani lawo liyababazeka!

¹⁸ Lokha nangilinga ukuwabala adlula ubunengi betjhwabatjhwaba. Ngitjho nalokha nangivukako, nalapho ngisese nawe ngemizindlo.

¹⁹ Nina abomele iingazi, dedani kimi! Zimu, kwanga bewungabhubhisa iinkhohlakali,

²⁰ iye, labo abakhuluma ikohliso ngawe. Izitha zakho ziphatha ibizo lakho butjhilweni.

²¹ Somnini, ngiyabazonda abakuzondako; ngiyabanyenya abahlubukako.

²² Ngibazonda ngezondo epheleleko; bazizitha kimi.

²³ Yewungiphenye Somnini, wazi ihliziywami; ngizizinye, wazi imikhumbulwami.

²⁴ Qala nakube ngisendleleni enesiphetho esinzima, ungirholele endleleni yasafuthi.