AMARHUBO 136 - IsiNdebele 2012 Translation

Ukuthokoza uZimu ngokwethembeka kwakhe

¹ Thokozani uSomnini ngombana ulungile – ukwethembeka kwakhe kujame isiphelani!

² Thokozani uZimu ophezu koke – ukwethembeka kwakhe kujame isiphelani!

³ Thokozani uSomandla oyiKosi yamakhosi – ukwethembeka kwakhe kujame isiphelani!

⁴ Nguye yedwa owenza iimangaliso ezikulu – ukwethembeka kwakhe kujame isiphelani –

⁵ nguye owenza amazulu ngelwazi – ukwethembeka kwakhe kujame isiphelani –

⁶ wendlala iphasi phezu kwamanzi – ukwethembeka kwakhe kujame isiphelani –

⁷ wadala iinkhanyisi ezikulu – ukwethembeka kwakhe kujame isiphelani –

⁸ iye, ilanga kobana libuse imini – ukwethembeka kwakhe kujame isiphelani –

⁹ inyanga neenkwekwezi kobana zibuse ubusuku – ukwethembeka kwakhe kujame isiphelani!

¹⁰ Nguye owamadlha amaGibhide ngokubulala amazibulwawo – ukwethembeka kwakhe kujame isiphelani –

¹¹ wenyula u-Israyeli hlangana nawo – ukwethembeka kwakhe kujame isiphelani –

¹² wamenyula ngamandla amakhulu nangesiphanga sakhe – ukwethembeka kwakhe kujame isiphelani –

¹³ wahlukanisa ilwandle lomGaba phakathi – ukwethembeka kwakhe kujame isiphelani –

¹⁴ wenza u-Israyeli bona ayame phakathi kwalo – ukwethembeka kwakhe kujame isiphelani –

¹⁵ wadlhunya uFaro nebutho lakhe ngaphakathi kwelwandle lomGaba – ukwethembeka kwakhe kujame isiphelani –

¹⁶ warhola abantu bakhe erhalawumbeni – ukwethembeka kwakhe kujame isiphelani –

¹⁷ wamadlha amakhosi amakhulu – ukwethembeka kwakhe kujame isiphelani –

¹⁸ iye, wabulala amakhosi anamandla – ukwethembeka kwakhe kujame isiphelani –

¹⁹ uSirhoni ikosi yama-Amori – ukwethembeka kwakhe kujame isiphelani –

²⁰ no-Ogi ikosi yeBhatjhani – ukwethembeka kwakhe kujame isiphelani –

²¹ wanikela inarhawo bona ibe lilifa – ukwethembeka kwakhe kujame isiphelani –

²² iye, ilifa lencekwakhe, u-Israyeli – ukwethembeka kwakhe kujame isiphelani!

²³ Nguye owasikhumbulako nasisabogabogako – ukwethembeka kwakhe kujame isiphelani –

²⁴ wasisindisa emanabenethu – ukwethembeka kwakhe kujame isiphelani –

²⁵ Nguye opha ukudla kikho koke okuphilako – ukwethembeka kwakhe kujame isiphelani –

²⁶ Thokozani uZimu wezulwini – ukwethembeka kwakhe kujame isiphelani!