AMARHUBO 135 - IsiNdebele 2012 Translation

Ukudumisa uSomnini nokulunga kwakhe

¹ Haleluya! Dumisani ibizo lakaSomnini, mdumiseni nina nceku zakhe,

² iye, nina enilotjha endlini kaSomnini, esirhodlweni sethempeli lakaZimethu.

³ Dumisani uSomnini ngombana ulungile, nirhubele ibizo lakhe, ngombana lihle.

⁴ Mbala, uSomnini ukhethe uJakopo bona abe ngowakhe, iye, u-Israyeli abe lilifa elingelakhe.

⁵ Kwamambala ngiyazi bona uSomnini mkhulu; iye, iKosethu yikulu ngaphezu kwabo boke abosingazimu.

⁶ USomnini wenza koke akuthandako ezulwini nephasini, iye, emalwandle nekuzikeni koke.

⁷ Nguye okhuphula amafu amhlophe emikhawulweni yephasi; wenzela izulu imibani; nguye ovuthela ummoya eenlulwini zakhe.

⁸ Nguye owarhayila amazibulo wamaGibhide, iye, amazibulo wabantu nefuyo.

⁹ Wathumela iimbonakaliso nemikarisomraro phakathi kwakho, wena Gibhide, ngokujamelana noFaro neenceku zakhe zoke.

¹⁰ Nguye owamadlha izizwe ezinengi, wabulala amakhosi anamandla:

¹¹ uSirhoni ikosi yama-Amori, u-Ogi ikosi yeBhatjhani namakhosi wemibuso yoke yeKanana.

¹² Wanikela inarhawo kobana ibe lilifa, iye, ilifa labantu bakhe, u-Israyeli.

¹³ Somnini, ibizo lakho lijame isiphelani, isinanazelo sakho ngeseenzukulwana ngeenzukulwana,

¹⁴ ngombana uSomnini umela abantu bakhe, abe nesirhawu eencekwini zakhe.

¹⁵ Abosingazimu bezizwe balisiliva negolide, benziwe ngezandla zomuntu:

¹⁶ Banemilomo kodwana ayikhulumi; banamehlo kodwana akaboni.

¹⁷ Baneendlebe kodwana azizwa; banjalo nje abanammoya emilonyenabo.

¹⁸ Ababenzileko bafana nabo; banjalo-ke boke abathembela kibo.

¹⁹ Wena ndlu ka-Israyeli, dumisani uSomnini! Wena ndlu ka-Aroni, dumisani uSomnini!

²⁰ Wena ndlu kaLevi, dumisani uSomnini! Nani enesaba uSomnini, mdumiseni!

²¹ Akadunyiswe uSomnini aseZiyoni, iye, yena ohlala eJerusalema. Haleluya!